*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:જીવનદર્શન* *બ્રહ્માકુમારીઝ આબુરોડ ખાતે સમાજ અને દેશમાં શાંતિ,એકતા અને વિશ્ર્વાસનું દિવ્ય વાતાવરણ પેદા કરવા પત્રકારોની પ્રેરણાદાયી કોન્ફરન્સ*

જીવનદર્શન….
બ્રહ્માકુમારીઝ આબુરોડ ખાતે સમાજ અને દેશમાં શાંતિ,એકતા અને વિશ્ર્વાસનું દિવ્ય વાતાવરણ પેદા કરવા પત્રકારોની પ્રેરણાદાયી કોન્ફરન્સ
નેગેટિવ વાતાવરણ કોઈ પણ પરિવાર, સમાજ કે દેશને નબળો બનાવે છે.રાષ્ટ્ર અને સમાજની મજબૂતાઈ માટે પોઝીટીવ વાતાવરણ અતિ મહત્વની ભૂમિકા ભજવે છે.દેશની ચોથી જાગીર ગણાતા પત્રકારોની ભૂમિકા કોઈ પણ સમાજ કે રાષ્ટ્રને મજબૂત બનાવવા માટે ખૂબ જ મહત્વપૂર્ણ છે.તારીખ 26-9-2025 શુક્રવારથી તારીખ 30-9-2025 મંગળવાર સુધી શાંતિવન, બ્રહ્માકુમારીઝ, આબુરોડ ખાતે સમગ્ર દેશવિદેશના પત્રકારોની ખૂબ જ પ્રેરણાદાયી કોન્ફરન્સ-2025નું સૂક્ષ્મતાસૂક્ષ્મ,દિવ્યાતિદિવ્ય અને ભવ્યાતિભવ્ય આયોજન કરવામાં આવ્યું હતું.રાજસ્થાનના મહામહિમ રાજયપાલ હરિભાઉ બાગડેજી દ્રારા આ કોન્ફરન્સનું દીપપ્રાગટ્ય દ્રારા ઉદઘાટન કરવામાં આવ્યું હતું.ભારત દેશના તમામ રાજ્યો તેમજ નેપાળ દેશ સહિત તમામ જગ્યાએથી 1100 ઉપરાંત પત્રકારો ખાસ ઉપસ્થિત રહ્યા હતા.મીડિયા વીગના બ્રહ્માકુમાર શાન્તનુજી સહિત સમગ્ર ટીમનું પ્લાનીગ કાબિલેદાદ હતું.ઉતર ગુજરાત મીડિયા વીગના બ્રહ્માકુમાર શશીકાંતભાઈ ત્રિવેદીની વિશેષ લાગણીને લીધે અમારે પણ આ કોન્ફરન્સમાં જવાનું થયું.ડીસાથી જાણીતા સાહિત્યકાર કનુભાઈ આચાર્ય,કોલમિસ્ટ ભગવાનભાઈ બંધુ, નાથાલાલ બ્રહ્મક્ષત્રિય, ફોટોગ્રાફર ચંદુભાઈ એટીડી, મનોજભાઈ ચૌહાણ, લક્ષ્મીબેન આચાર્ય,ચારૂબેન ઠક્કર સહિત સૌએ આ કોન્ફરન્સમાં હાજરી આપી સમગ્ર આયોજનનું સંપૂર્ણ અવલોકન કર્યું તેમજ કોન્ફરન્સની સંપૂર્ણ માહિતી મેળવી.
પ્રિન્ટ મીડિયા, ઈલેક્ટ્રોનિક મીડિયા, સોશિયલ મીડિયા,ડીજીટલ મીડિયા અને ખાસ કરીને એ.આઈ.ઉપર અલગ અલગ વક્તાઓએ વિસ્તૃત માહિતી આપી.ખૂબ જ અનુભવી, સંઘર્ષશીલ, પ્રગતિશીલ અને માહિતીસભર વકતાઓએ મીડિયા જગતના આપણા ભવ્ય ભૂતકાળથી લઈને વર્તમાન સમયની સમસ્યાઓ,સગવડો અને પત્રકારોના પોઝીટીવ સંગઠન વિષે રસપ્રદ વાતો કરી.ભારત અને વિશ્ર્વમાં અનેક જગ્યાએ વિવિધ કારણોસર કોઈને કોઈ સંસ્થા કે પક્ષ દ્રારા પત્રકારોનાં સંમેલનો કે કોન્ફરન્સ થાય છે.આ બધામાં ક્યાંક કોઈકનો નીજી સ્વાર્થ હોય છે.બ્રહ્માકુમારીઝ દ્રારા થતી મીડિયા કોન્ફરન્સમાં સમાજ કે રાષ્ટ્રને મજબૂત બનાવવા માટે સંપૂર્ણપણે એક નવી પોઝીટીવ દિશા આપવામાં આવે છે.ચારપાંચ દિવસની કોન્ફરન્સમાં અપાતી માહિતી અને મનોમંથનના અંતે પત્રકારો રિલેક્સ, રીફ્રેશ, રીચાર્જ થઈ ભવિષ્યમાં સારી રીતે રીસેટ થવા ઘણું બધું ભાથું લઈને જાય છે.નેગેટીવ વિચારોને જીવનમાંથી રીમુવ કરી એક નવા રીમોટ સાથે પોતાના જીવનને તો સુધારે જ છે પણ રાષ્ટ્રને મજબૂત બનાવવાનો અનેરો-અનોખો સંકલ્પ કરે છે.
ભારત દેશની આજુબાજુ શ્રીલંકા, બાંગ્લાદેશ,નેપાળ જેવા દેશોમાં તાજેતરમાં થયેલ અરાજકતા, અશાંતિ અને સતા પરિવર્તનમાં મીડિયાની ભૂમિકા ખૂબ જ મહત્વની અને મોટાભાગે નેગેટિવ રહી છે.વર્તમાન સમયમાં તલવાર કરતાંય કલમ વધારે મજબૂત ગણાય છે.આઝાદીની ચળવળ વખતે પત્રકારોની ભૂમિકા ખૂબ જ મહત્વપૂર્ણ રહી હતી.સુશાસન માટે પત્રકારોની જાગૃતિ ખૂબ જ અસરકારક અને અગત્યની છે.તંત્રી,ખબરપત્રી, ફોટોગ્રાફર,પ્રેસ સ્ટાફ એમ બધાનું સંકલન હોય ત્યારે એક સારૂં અખબાર બહાર પડે છે.સારૂ નેટવર્ક અને સારા ફેરિયા હોય ત્યારે અખબાર લોકોના ઘર સુધી પહોંચે છે.આ બધા જ પોઝીટીવ હોય ત્યારે જ પોઝીટીવ સમાચારો થકી સમાજ અને રાષ્ટ્ર મજબૂત બને છે.આવી જ વ્યવસ્થા ઈલેક્ટ્રોનિક મીડિયામાં હોય છે.સમયાંતરે સોશીયલ મીડિયા કે ડીજીટલ મીડિયાનું જોર વધી રહ્યું છે પણ તેમાં નકારાત્મક ઘણું પીરસાઈ રહ્યું છે.માણસ સાવચેતી ના રાખે તો અનર્થ થવાનો ઘણો સંભવ છે.
દિયોદર-થરાદના અમારા વેવાઈ બ્રહ્માકુમાર જયરામભાઈ ઠક્કરના પરિચિત કોટા નિવાસી હાલ આબુરોડ શાંતિવન ખાતે રહેતા બ્રહ્માકુમાર દીનદયાલજીના માધ્યમથી પરમ વંદનીય,પૂજનીય,રાજયોગિની ડોક્ટર દાદી રતનમોહિનીજીના નિવાસસ્થાનાં દર્શન કરવાનો અનેરો અવસર મળ્યો.140 દેશોમાં બ્રહ્માકુમારીઝની શાખાઓ આવેલી છે.સમગ્ર વિશ્ર્વને અશાંતિમુકત,નશામુક્ત, ટેન્શનમુકત બનાવી પ્રેમ,ભાઈચારો, શાંતિ,એકતા, વિશ્ર્વાસ,સદભાવનાનું દિવ્ય અને પવિત્ર વાતાવરણ પેદા કરવાનું પ્રેરણાદાયી સત્કાર્ય બ્રહ્માકુમારીઝ દ્રારા થઈ રહેલ છે ત્યારે પત્રકારો પણ તેમાં મહત્વની ભૂમિકા ભજવે તેવા શુભ આશયથી આયોજિત થયેલ આ મીડિયા કોન્ફરન્સ ખૂબ જ ફળદાયી રહી.બ્રહ્માકુમારીઝ પરિવારને સરહનીય, અનુમોદનીય,અનુકરણીય સત્કાર્યો માટે કોટિ કોટિ વંદન.
ભગવાનભાઈ બંધુ
મોબાઈલ..9825638643