મોરબી : મોરબીના ઘુંટું ગામની સીમમા આવેલ હરી ઓમ સોસાયટીમા શેરીમા આવેલા બમ્પ ઠેકીને બાઈક સીધું જ વિજપોલ સાથે અથડાતા બાઈક ચાલકનું ઘટનાસ્થળે કમકમાટીભર્યુ મોત નીપજ્યું હતું. મોરબી તાલુકા પોલીસે આ બનાવની ફરિયાદ નોંધી આગળની કાર્યવાહી હાથ ધરી છે. આ અકસ્માતના બનાવની મોરબી તાલુકા પોલીસ સ્ટેશનેથી પ્રાપ્ત થતી વિગતો અનુસાર મોરબીના ઘુંટુ ગામની સીમમાં આવેલ ઓમ પાર્ક સોસાયટીમાં ધીરૂભાઇ ગોરાના મકાનમા રહેતા રાજેશભાઇ પ્રાગજીભાઇ કવૈયા (ઉ.વ.૫૫) નામના આધેડ તા.૬ ના રોજ રાત્રિના આશરે સાડા દસેક વાગ્યા પોતાના હીરો હોન્ડા સીડી ડીલક્ષ મો.સા.નં-GJ-03-CH 6540 પર હરી ઓમ સોસાયટીમા શેરીમા પોતાના ઘર તરફ આવી રહ્યા હતા. ત્યારે શેરીમા રસ્તામા બમ્પ હોવાથી પોતે મો.સા.પરનો કાબુ ગુમાવતા બાજુમા આવેલ ઇલેટ્રીક થાંભલા સાથે મો.સા. અથડાતા બાઈક ચાલક આધેડને માથાના ભાગે ગંભીર ઇજા થવાથી તેમનું ઘટનાસ્થળે કમકમાટીભર્યું મોત નીપજ્યું હતું. આ બનાવ અંગે તાલુકા પોલીસે ફરિયાદ નોંધી વધુ તપાસ હાથ ધરી છે.
