*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒: જાણીતા સાહિત્યકાર કનુભાઈ આચાર્ય લેખિત પુસ્તક “હૈયાના હસ્તાક્ષર” નું બનાસ સાહિત્ય કલા સંઘ અને વંચિત સેવા ટ્રસ્ટ દ્વારા ડીસા જલારામ મંદિર ખાતે કરવામાં આવ્યું શાનદાર વિમોચન*

જાણીતા સાહિત્યકાર કનુભાઈ આચાર્ય લેખિત પુસ્તક “હૈયાના હસ્તાક્ષર” નું બનાસ સાહિત્ય કલા સંઘ અને વંચિત સેવા ટ્રસ્ટ દ્વારા ડીસા જલારામ મંદિર ખાતે કરવામાં આવ્યું શાનદાર વિમોચન
જેમના દ્વારા અનેક પુસ્તકો લખાયાં છે એવા બનાસકાંઠાના મેઘાણી, જાણીતા સાહિત્યકાર કનુભાઈ આચાર્ય લેખિત પુસ્તક “હૈયાના હસ્તાક્ષર ” નું બનાસ સાહિત્ય કલા સંઘ અને વંચિત સેવા ટ્રસ્ટના માધ્યમથી જલારામ મંદિર હોલ ડીસા ખાતે વરસાદી માહોલમાં પણ શાનદાર વિમોચન કરવામાં આવ્યું હતું.કાર્યક્રમના અધ્યક્ષ તરીકે ગુર્જરી ટ્રાયબલ ટ્રસ્ટ મુંબઈના પ્રમુખ શીવશંકરભાઈ જોષી જ્યારે મુખ્ય વક્તા/વિમોચક તરીકે અમદાવાદના જાણીતા લેખક કિશોરસિંહજી સોલંકી ખાસ ઉપસ્થિત રહ્યા હતા.દીપપ્રાગટવિધિ ડીસાના જાણીતા સેવાભાવીઓ ડો.નવીનભાઈ શાહ અને ડો.સી.કે.પટેલ દ્વારા કરવામાં આવી હતી.મુખ્ય મહેમાન તરીકે રેડક્રોસ ડીસાના પ્રમુખ નટુભાઈ પટેલ તેમજ પાલનપુરના સેવાભાવી ડો.સુરેન્દ્રભાઈ ગુપ્તા ઉપસ્થિત રહ્યા હતા.અતિથિવિશેષ તરીકે અમરજ્યોત એજ્યુકેશન ટ્રસ્ટ રાધનપુરના પ્રમુખ મહેશભાઈ મુલાણી,ભાભર નગરપાલિકાના પૂર્વ પ્રમુખ હરિભાઈ આચાર્ય, વારાહી કેળવણી મંડળના પ્રમુખ ફરશુભાઈ ગોકલાણી તેમજ ઓગડ તાલુકા પંચાયતનાં ઉપપ્રમુખ ભારતીબેન નિરંજનભાઈ ઠક્કર ખાસ ઉપસ્થિત રહ્યાં હતાં. આશીર્વચન પૂજ્ય યશવંત શાસ્ત્રીજી મહારાજે સંસ્કૃતમાં આપતાં સૌએ રાજીપો વ્યક્ત કર્યો હતો.
સમગ્ર કાર્યક્રમ નિર્ધારિત સમયે શરૂ થતાં તમામ વકતાઓ તેમજ શુભેચ્છકોએ કનુભાઈ આચાર્યની સરાહના સાથે પોતાનાં વકતવ રજૂ કરી સમગ્ર કાર્યક્રમની ભારે પ્રશંસા કરી હતી. પુસ્તકનું વિમોચન ઢોલ-શરણાઈના ઢબૂકતા નાદે વાજતેગાજતે પુષ્પવર્ષા સાથે કરાયું હતું.વરસાદી માહોલ હોવા છતાં મોટી સંખ્યામાં સાહિત્યરસિકો પધાર્યાં હતા. કનુભાઈ આચાર્યના સાહિત્ય ઉપર પી.એચ.ડી.થનાર ડો.હરચંદભાઈએ તેમનો થીસીસ કનુભાઈ આચાર્યને વાજતેગાજતે અર્પણ કર્યો હતો.કાર્યક્રમની સફળતા માટે જલારામ ગૌ સત્સંગ મંડળ ડીસાના હરિભક્તો તેમજ વિવેકાનંદ એકેડેમીના સ્ટાફે નિષ્ઠાપૂર્વક પ્રયત્નો કર્યા હતા.
બનાસ સાહિત્ય કલા સંઘના મંત્રી નાથાલાલ ખત્રીએ શાબ્દિક સ્વાગત કર્યું હતું.વંચિત સેવા ટ્રસ્ટના ઈશ્વરભાઈ રાવળ અને ચંદુભાઈ એટીડીએ સમગ્ર કાર્યક્રમનું સંકલન કર્યું હતું.બનાસ સાહિત્ય કલા સંઘના મહામંત્રી ભગવાનભાઈ બંધુએ સમગ્ર કાર્યક્રમનું સમયબધ્ધ સંચાલન કરી અનોખી પ્રેરણા પૂરી પાડી હતી. લેખક કનુભાઈ આચાર્યે ઉપસ્થિત સૌકોઈ પ્રત્યે ઋણ સ્વીકારની લાગણી વ્યક્ત કરી હતી.ખૂબ સારી સંખ્યામાં પુસ્તકોનું વેચાણ થતાં તમામ સાહિત્યરસિકોમાં આનંદની લાગણી પ્રસરી હતી.