કોંગ્રેસના અગ્રણીએ માર્ગ અને મકાન વિભાગને રજુઆત કરી રોડનું કામ ચાલુ કરવા દસ દિવસનું એલટીમેટમ આપ્યું
મોરબી : મોરબીના નાની વાવડી-બગથળા અને આમરણ રોડનું કામ મંજુર થયું હોવા છતાં હજુ સુધી કામ ચાલુ ન કરતા ખરાબ રોડથી હાલાકી વધતી હોવાથી આ રોડનું કામ ચાલુ કરાવવા કોંગ્રેસ અગ્રણી મેદાને આવ્યા છે અને તેમણે માર્ગ અને મકાન વિભાગને રજુઆત કરી રોડનું કામ ચાલુ કરવા દસ દિવસનું એલટીમેટમ આપી જો આ કામ ચાલુ ન થાય તો આંદોલન કરવાની ચીમકી આપી છે. મોરબી તાલુકા કોંગ્રેસ સમિતિના પ્રમુખ કે.ડી. પડસુમબિયાએ માર્ગ અને મકાન વિભાગને રજુઆત કરી હતી કે, મોરબીના નાની વાવડી-બગથળા અને આમરણ રોડ ઘણા સમયથી ખરાબ હાલતમાં છે. ખરાબ માર્ગને કારણે અકસ્માતનું જોખમ રહે છે અને ગામના બીમાર વ્યક્તિને હોસ્પિટલમાં લઈ જવા માટે ભારે મુશ્કેલી વેઠવી પડે છે. જો કે આ રોડને ટંકારાના ધારાસભ્ય લલીતભાઈ કગથરાએ જૂન-2021 માં મંજૂર કરાવ્યો હતો. છતાં હજુ સુધી માર્ગ અને મકાન વિભાગ દ્વારા આ રોડનું કામ શરૂ કરવામાં આવ્યું નથી. આ અંગે વારંવાર રજુઆત કરવા છતાં કોઈ પરિણામ આવ્યું નથી. આથી તેઓએ ફરી માર્ગ અને મકાન વિભાગને રજુઆત કરી 10 દિવસમાં આ રોડનું કામ ચાલુ નહિ થાય તો સ્થાનિકોને સાથે રાખી ધરણા અને રસ્તા રોકો આંદોલન કરવાની ચીમકી આપી છે.
