મોરબી તા ૨૯ : મોરબીના લીલાપર ગામની સીમમાં ગોડાઉન ભાડે રાખી દારૂનો કાળો કારોબાર ચાલી રહ્યો હોવાની બાતમીને આધારે એલસીબી ટીમે દરોડો પાડી રૂપિયા 40,51,800ના મુદ્દામાલ સાથે એક આરોપીને ઝડપી લઈ વિદેશી દારૂની 8988 બોટલ કબ્જે કરી ત્રણ આરોપીઓના નામ ખોલવામાં સફળતા મેળવી છે.
પ્રાપ્ત વિગતો મુજબ મોરબી એલસીબી ટીમના સુરેશભાઈ હુંબલ, સંજયભાઈ રાઠોડ અને વિક્રમભાઈ કુગસિયાને મળેલી બાતમીને આધારે લીલાપર ગામની સીમમાં રાધેપાર્ટી પ્લોટ પાછળના ભાગે આવેલા ગોડાઉનમાં દરોડો પાડતા ગોડાઉનમાંથી (1.) ઓલ સીઝન ગોલ્ડન વ્હીસ્કીની 2016 બોટલ કિંમત રૂપિયા 12, 09,600 (2.) રોયલ ચેલેન્જ વ્હીસ્કીની 1320 બોટલ કિંમત રૂ.6,86,400 (૩.) મેકડોવેલ નંબર વન વ્હીસ્કીની 4200બોટલ કિંમત રૂપિયા 15,75,000 અને રોયલ સ્ટગ વ્હીસ્કીની 1452બોટલ કિંમત રૂપિયા 5,80,800 સહિત કૂલ રૂપિયા 40,51, 800નો મુદ્દામાલ મળી આવતા આરોપી મિત વિજયભાઈ ચૌહાણ, રહે. પ્રધાનમંત્રી આવાસ યોજના, દલવાડી સર્કલ નામના આરોપીને ઝડપી લેવામાં આવ્યો હતો.
વધુમાં એલસીબી ટીમે દારૂના જથ્થા સાથે પકડાયેલા શખ્સની પૂછપરછમાં દારૂના આ કાળા કારોબારમાં આરોપી દીપકસિંહ ખોડુભા વાધેલા, રહે. નાની બજાર મોરબી, ચંદ્રસિંહ સરદારસિંહ ઝાલા, રહે. લજાઈ અને ચેતનસિંહ રવીન્દ્રસિંહ ચૌહાણ, રહે. ગુજરાત હાઉસિંગ બોર્ડ ક્વાર્ટર, શનાળા રોડ વાળાના નામ ખુલતા ત્રણેયને ફરાર દર્શાવી મોરબી તાલુકા પોલીસ મથકમાં ફરિયાદ દાખલ કરી છે.
આ સફળ કામગીરી ઇન્ચાર્જ એલસીબી પીઆઇ એન.એચ.ચુડાસમા, પીએસઆઇ એ.ડી.જાડેજા તેમજ એલસીબી, પેરોલ ફરલો સ્ક્વોડ સહિતની ટિમ દ્વારા કરવામાં આવી હતી.
