*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:જીવનદર્શન* *શિક્ષક દિનના અતિ પવિત્ર અવસરે ઉતર ગુજરાતના શ્રેષ્ઠ શિક્ષક આચાર્ય* *સ્વ.આચાર્ય શંભુભાઇ ઠક્કરનું દિવ્ય સ્મરણ*

જીવનદર્શન
શિક્ષક દિનના અતિ પવિત્ર અવસરે ઉતર ગુજરાતના શ્રેષ્ઠ શિક્ષક,આચાર્ય
સ્વ.આચાર્ય શંભુભાઇ ઠક્કરનું દિવ્ય સ્મરણ
ઉત્તર ગુજરાતમાં અને તેમાંય વઢિયાર પંથકમાં શિક્ષણનું ઉત્તમ કામ કર્યું હોય તેવા શિક્ષણવિદ્ આચાર્ય શંભુભાઈ ઠક્કરનો જન્મ તારીખ 30-11-1913 ના રોજ બનાસકાંઠા જિલ્લાના મોરવાડા ગામમાં થયો હતો. 10 વર્ષની નાની ઉંમરે તેમના પિતા દલપતરામ તેમને મોરવાડાથી અભ્યાસ અર્થે રાધનપુર લાવેલા. આદરણીય શંભુભાઈનું પ્રાથમિક શિક્ષણ તેમજ માધ્યમિક શિક્ષણ રાધનપુરમાં જ થયેલું. તેઓ બાળપણથી જ અભ્યાસમાં ખૂબ જ તેજસ્વી હતા. કુટુંબની આર્થિક પરિસ્થિતિ ખૂબ જ સામાન્ય કક્ષાની હતી. બી.એસ.સી. નો અભ્યાસ તેમણે ભાવનગરની શામળદાસ કોલેજમાંથી કરેલો. તે પછી તેમણે વડોદરાની મહારાજા સયાજીરાવ ગાયકવાડ યુનિવર્સિટીમાંથી એસ.ટી.સી. નો અભ્યાસ પૂર્ણ કરેલો. 1936થી તેઓ રાધનપુર હાઇસ્કુલમાં શિક્ષક તરીકે જોડાયા.
1967 સુધી શિક્ષક તેમજ આચાર્ય તરીકે તેઓ રાધનપુર હાઈસ્કૂલમાં રહેલા. પાછળથી રાધનપુર હાઇસ્કુલનો વહીવટ રાધનપુર જૈન મંડળ હસ્તક થયો અને રાધનપુર હાઇસ્કુલનું શેઠ કે.બી. વકીલ હાઈસ્કૂલ તરીકે નામકરણ થયેલું. શેઠ કે.બી. વકીલ હાઇસ્કુલ ના પહેલા આચાર્ય તરીકે તેઓ જીવ્યા ત્યાં સુધી રહ્યા. રાધનપુર હાઇસ્કુલની નામના ગુજરાતભરમાં ફેલાયેલી હતી. ઉત્તર ગુજરાતની ઘણી હાઇસ્કુલમાં આચાર્ય તરીકે રાધનપુર હાઈસ્કૂલના શિક્ષકો રહ્યા હતા. ઉચ્ચ સરકારી અમલદારોમાં રાધનપુર હાઇસ્કુલના ઘણા વિદ્યાર્થીઓ હતા. ઉત્તર ગુજરાતના વઢિયાર પંથકના 50-60 વર્ષ પહેલાના લોકોએ શંભુભાઈનું નામ સાંભળેલું હશે કે તેમની પાસે ભણેલા હશે. આજે પણ તેઓ ખૂબ જ પ્રેમ અને આદરપૂર્વક તેમને યાદ કરે છે.
માનનીય શંભુભાઈ પોતે વિજ્ઞાનના સ્નાતક પરંતુ ગણિત- વિજ્ઞાનની સાથે સંસ્કૃત, ગુજરાતી, યોગ, મનોવિજ્ઞાન જેવા વિષયોના ખૂબ જ અભ્યાસુ હતા. વિજ્ઞાનના પ્રયોગો તેમજ જાદુની પ્રયુક્તિઓ વર્ગમાં રજૂ કરતા. આજે તેમના અવસાનના 57 વર્ષ પછી પણ તેમના વિદ્યાર્થીઓ તેમને ગર્વ અને ગૌરવપૂર્વક યાદ કરે છે. તેઓ શિસ્તના ખૂબ જ કડક આગ્રહી હતા, પરંતુ વિદ્યાર્થીઓના હિત માટે મા સમાન વાત્સલ્ય પણ વરસાવતા.
રાધનપુર હાઇસ્કુલમાં એક દિવસ કરીમખાન નામના વિદ્યાર્થીએ એક જૈન દીકરીની મશ્કરી કરેલી. આ કરીમખાન રાધનપુરના છેલ્લા નવાબ મુર્તુજાખાનજી નો ભત્રીજો હતો. શંભુભાઈએ કરીમખાનને ત્રણ તમાચા મારી દીધેલા. શિક્ષણ આલમમાં શિક્ષકો ચર્ચા કરતા હતા કે શંભુભાઈનું આવી બન્યું જ સમજો. નવાબ શંભુભાઈને સજા કરશે અને શાળામાંથી ડીસમીસ કરશે. શંભુભાઈ પોતાનું રાજીનામું લખીને નવાબ મૂર્તુજાખાનને મળે છે અને બધી વિગતો જણાવે છે. નવાબ મૂર્તુજાખાને કરીમખાનને તમાચો લગાવી કહે છે. “કરીમ, સ્ટેટકો માસ્તર સાહબ કી જરૂરત હૈ, તેરી જરૂરત નહીં,કલસે યહાંસે દફા હો જાના”. રાધનપુર નવાબ સાહેબ માનનીય શંભુભાઈ સાહેબનો ખૂબ જ આદર અને સત્કાર કરતા.
આઝાદી સમયે રાધનપુર પાકિસ્તાનમાં ભળશે તેવી હવા હતી. તે વખતે આ ગુપ્ત ચળવળની વાત જાણીને મુક્તિભાઈ વિરવાડીયા તેમજ અન્ય સજજનો સાથે રહીને શંભુભાઈએ રાધનપુરની સઘળી હકીકતો સરદાર વલ્લભભાઈ પટેલને તારથી જણાવી હતી. સરદાર વલ્લભભાઈ પટેલના સેક્રેટરી જે. એન. મેનન સાહેબે નવાબ મૂર્તુજાખાનને અમદાવાદ શાહીબાગ એનેક્ષી ખાતે બોલાવી તેમના હસ્તાક્ષર કરાવ્યા હતા. અને આમ રાધનપુર પાકિસ્તાનમાં ભળતું અટકી ગયું‌ હતું.રાધનપુર પાકિસ્તાનમાં ભળતું અટક્યું તેમાં દસેક મહાનુભાવોનો ફાળો રહેલો તેમાંના આચાર્ય શંભુભાઈ ઠક્કર સાહેબ પણ એક હતા.
રવિશંકર મહારાજનું વિચરણ તે વખતે વઢિયાર પંથકમાં ચાલતું હતું. એટલે રવિશંકર મહારાજ રાધનપુર પંથકના મહેમાન થાય એટલે શંભુભાઈ સાહેબ રવિશંકર મહારાજ સાથે વિચરણમાં અવશ્ય જોડાતા. રાધનપુર હાઇસ્કુલમાં કવિ દુલાભાયા કાગનો લોક સાહિત્યનો કાર્યક્રમ હોય ત્યારે તેઓ દુલાભાયા કાગ સાથે જ્ઞાન ગોષ્ઠીમાં જોડાતા. ચુનીલાલ વર્ધમાન શાહની અમર કૃતિ “જીગર અને અમી” એ સત્ય કથાના નાયક જીગર પરિભ્રમણ કરતા કલકત્તાથી રાધનપુર આવેલા અને રાધનપુરમાં શંભુભાઈ સાથે તેમનો વાર્તાલાપ થયેલો. “રબર મેન ઓફ ઇન્ડિયા” નો રાધનપુર હાઇસ્કુલમાં કાર્યક્રમ હોય કે વિવિધ કાર્યક્રમો હોય પણ આદરણીય શંભુભાઈનો વિવિધ મહાનુભાવો સાથેનો ઘરોબો રહેતો. વઢિયારના અનેક લોકોને આગળ આવવા કે તેમની કારકિર્દી બનાવવા માટે શંભુભાઈએ ખૂબ જ મદદ કરેલી.
1966માં ગુજરાત સરકારે શંભુભાઈની બહુમૂલ્ય સેવાઓને ધ્યાનમાં લઈને ગુજરાત સરકારનો શ્રેષ્ઠ શિક્ષકનો એવોર્ડ તે વખતના રાજ્યપાલ મહામહિમ શ્રીમન્નારાયણ સાહેબના વરદ હસ્તે આપીને તેમનું બહુમાન કરેલું. શંભુભાઈના મોટા દીકરા અને મારા ગુરૂજી પરમ વંદનીય નિરંજનભાઇ સાહેબને 1980માં રાજ્યપાલ મહામહિમ શારદાબેન મુખર્જીના વરદ હસ્તે ગુજરાત સરકારના શ્રેષ્ઠ શિક્ષકનું પારિતોષિક મળેલું. 2019 માં શંભુભાઈના પૌત્ર અને આ લેખ માટે માહિતી પૂરી પાડનાર કલ્પેશભાઈને રાજ્યપાલ મહામહીમ આચાર્ય દેવવ્રતજી સાહેબના વરદ હસ્તે શ્રેષ્ઠ શિક્ષક તરીકેનું પારિતોષિક પ્રાપ્ત થયેલ. આમ, એક જ કુટુંબના ત્રણ ત્રણ વ્યક્તિ એટલે કે ત્રણ પેઢીને ગુજરાત સરકારે શ્રેષ્ઠ શિક્ષક પુરસ્કારથી સન્માનિત કર્યા હોય તેવો આ પ્રેરણાદાયી પ્રથમ દાખલો છે.સમગ્ર શિક્ષણ જગત તેમજ રઘુવંશી લોહાણા સમાજ માટે આ ગૌરવપ્રદ ઘટના છે.
આદરણીય શંભુભાઈનું 5-7-1967 ના રોજ અવસાન થયેલું. તાજેતરમાં જ તારીખ 5 સપ્ટેમ્બરે શિક્ષક દિનની ઉજવણી થઈ તેમજ કેટલાક આદરણીય શિક્ષકશ્રીઓને મહામહિમ રાજયપાલ સાહેબના વરદહસ્તે શ્રેષ્ઠ શિક્ષક પારિતોષિક અપાયું ત્યારે આદરણીય શંભુભાઈ સાહેબને ગર્વ અને ગૌરવપૂર્વક યાદ કરતાં વિશેષ આનંદની લાગણી થાય છે.
ભગવાનદાસ બંધુ
મોબાઈલ..9825638643