*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:જીવનદર્શન* *”દેહદાતા” મુઠ્ઠી ઊંચેરા માનવી ન્યાલચંદભાઈ પીતાંબરભાઈનું અતિ પ્રેરણાદાયી જીવન*

આ પૃથ્વી ઉપર લાખો લોકો જન્મે છે અને મૃત્યુ પામે છે.કેટલાક લોકોની વિદાય વસમી લાગે છે.પિતા પીતાંબરભાઈ ભારમલભાઈ તન્ના અને માતા પૂરાંબેનના પરિવાર માં તારીખ1-6-1947 ના રોજ હાલ પાકિસ્તાનના નગરપારકર ખાતે જન્મેલા ન્યાલચંદભાઇ નાનપણથી જ સેવાભાવી હોય તેવું તેમનું સમગ્ર જીવન રહ્યું છે.ન્યાલચંદભાઈ પીતાંબરભાઇ તન્નાએ તારીખ 3-10-2025 શુક્રવારે આ પૃથ્વી ઉપરથી વિદાય લીધી છે તેવા સમાચાર જાણીને સમગ્ર પારકર સમાજ, અખિલ રઘુવંશી લોહાણા સમાજ ઉપરાંત સમગ્ર માનવ સમાજે આધાતની લાગણી અનુભવી હોય તેવો અહેસાસ સૌને થયો હતો.
ન્યાલચંદભાઇ છેલ્લા પાંચેક વર્ષથી પથારીવશ હતા. આ દરમિયાન શાંતાબેન, ચંદ્રકાન્તભાઈ, પીનલબેન તથા સમગ્ર પરિવારે ખડેપગે સેવા કરી છે અને અધતન સારવાર કરાવી છે. જેની પારકર સમાજની સાથે સાથે સમગ્ર રઘુવંશી લોહાણા સમાજ કદર કરે છે. એમના અવસાનથી પરિવાર, સમાજ તેમજ પાટણ નગરને કદીએ ના પુરી શકાય તેવી મોટી ખોટ પડી છે.
ન્યાલચંદભાઇ સમગ્ર માનવસમાજના હિતચિંતક હતા. પારકર સમાજના હોવાને નાતે પારકર સમાજની સતત વધારે ચિંતા કરતા હતા. હંમેશાં હસતો ચહેરો, મજાકીયો સ્વભાવ,નિખાલસ વાતો, પરોપકારી સ્વભાવ, સમાધાનકારી વલણ, બિનવિવાદાસ્પદ વ્યક્તિત્વ અને સમાજ માટે કંઈક કરી છૂટવાની ભાવના એ એમના વિરલ સદગુણો હતા.
પાટણમાં મારવાડી,દેશી,વાગડ,સાતગામી,પારકર એમ વિવિધ ગોળના લોહાણા પરિવારો વસવાટ કરે છે.સેવાના મજબૂત સ્થંભ સમાન ભવ્યાતિભવ્ય,દિવ્યાતિદિવ્ય જલારામ મંદિર પાટણમાં નિર્માણ પામેલ છે. પારકર સમાજનાં માત્ર ચાર પાંચ ઘર હોવા છતાં ન્યાલચંદભાઈ સૌની સાથે એકરૂપ,એકરસ,એકમત થઇને રહેતા. તેથી તેઓ ખૂબ જ માન, સન્માન, પ્રેમ અને આદર પ્રાપ્ત કરી શક્યા હતા.
જલારામ મંદિર પાટણના પાયાના ટ્રસ્ટી તરીકે ખૂબ પ્રસંશનીય કામગીરી કરીને ચાહના મેળવી હતી. આ સિવાય આશાપુરા માતા મંદિર, ગાયત્રી મંદિર પાટણ,આભાદીદી આશ્રમ તથા ધાણધરા આશ્રમ સહિત વિવિધ સંસ્થાઓમાં નિસ્વાર્થ ભાવે સેવા આપી હતી.એમની અંતિમયાત્રા સમયે હાજર લોકોની આંખોમાં આંસું સુકાતા નહોતા.એક મુઠી ઉંચેરા માનવીની વસમી વિદાય થયાની અતિ દુઃખદ લાગણી સૌએ અનુભવી હતી.
પાટણમાં પારકર સમાજનાં માત્ર ચાર પાંચ જ ઘર હોવા છતાં હેમંતભાઈ તન્ના પાટણ નગરપાલિકાના પ્રમુખ પદે ચુંટાયા હતા એજ એમના પરિવારની લોકપ્રિયતાનો સાચો પુરાવો છે.હેમંતભાઈ તન્ના અને ચંદ્રકાંતભાઈ તન્ના પણ ન્યાલચંદભાઈની જેમ જ સમગ્ર માનવ સમાજ સાથે ખૂબ જ હળીમળીને રહે છે.પારકર લોહાણા સમાજ ભારત પાકિસ્તાનના ભાગલા પછી એટલે કે 1947 પછી ધીરે ધીરે ભારતમાં સ્થળાંતરિત થયો છે.ખૂબ જ સંઘર્ષ,મહેનત, દીર્ઘદ્રષ્ટિ,સંગઠન, શિક્ષણ અને વ્યાપારની આગવી સૂઝ થકી ગુજરાત ઉપરાંત દેશ-વિદેશમાં સેટ થયો છે.પારકર લોહાણા સમાજ સંગઠનની કિંમત ખૂબ જ સારી રીતે જાણે છે. એમાંય ન્યાલચંદભાઈ તન્ના જેવા વડીલોએ તો સમગ્ર માનવસમાજ સાથે ભાઈચારો કેળવી પારકર લોહાણા સમાજની એક આગવી ઓળખ ઉભી કરી છે.
પાટણમાં સમાજના કોઈ પણ જ્ઞાતિજન સારવાર અર્થે આવેલ હોય તો તેમને કયા ડોક્ટર પાસે જવું એની યથાયોગ્ય સલાહ આપવી, ડોક્ટરને ભલામણ કરવી તથા હોસ્પિટલમાં દાખલ જ્ઞાતિજનને બોલાવવા જવું, ચા-નાસ્તો કે જમવાનો આગ્રહ કરીને જમાડવા, હોસ્પિટલે ટીફીન મોકલવું વગેરે માનવિય સેવાઓ ન્યાલચંદભાઈ જાતે કરતા હતા. કોઈપણ જ્ઞાતિજન હોસ્પિટલમાં દાખલ હોય તો દુકાન વધાવીને સીધા દવાખાને જતા, દર્દીની ખબર અંતર પુછતા અને કંઈ પણ કામ હોય તો જણાવજો એવું કહીને પછી જ ઘરે જતા.કોઈ પણ સેવાકાર્ય ધર્મપત્ની તથા પરિવારના સાથ સહકાર વગર શક્ય બનતું નથી. તેમનાં આદર્શ ધર્મપત્ની શાંતાબેન હરહંમેશા એમની પડખે ઊભા રહીને દરેક સત્કાર્યોમાં સાથે રહ્યાં છે. ન્યાલચંદભાઇનું સમગ્ર પરિવાર કાયમ માટે તેમની સાથે જ રહ્યું છે.
ન્યાલચંદભાઇને સંતાનમાં એક પુત્ર ચંદ્રકાન્તભાઈ છે, પરંતુ મોટાભાઇની (૬)છ દિકરીઓ અને ત્રણ દિકરાઓને તેમણે પિતા જેટલો જ પ્રેમ અને લાગણી આપી હતી.એમના પરિવારની એકતા અને સંપ વંદન, અભિનંદન ,સરાહના અને અનુકરણ કરવાને લાયક રહી છે.
આટઆટલી સમાજસેવા કરવા છતાંય હજુ સમાજને વધારે શું આપી શકાય તેવા વિચારો સતત એમના મનમાં ચાલ્યા કરતા અને સમાજસેવા કર્યાનું કયારેય એમને અભિમાન નહોતું.એટલે જ પોતાની તંદુરસ્તી દરમિયાન પરિવારના સભ્યોને જાણ કર્યા વગર પોતાના દેહદાન જેવો કઠોર પરંતુ પ્રેરણાદાયી નિર્ણય તેમણે જાતે લીધો હતો. દેહદાનની આ ખૂબ જ માનવતાવાદી ઘટના પારકર લોહાણા સમાજના ઇતિહાસમાં કદાચ પ્રથમ વિરલ ઘટના છે. એમનો પાર્થિવ દેહ વિધીવત રીતે ધારપુર મેડિકલ કોલેજમાં સુપરત કરવામાં આવ્યો હતો. આનાથી મોટી બીજી સમાજસેવા શું હોઈ શકે?એમની પ્રખર સેવાભાવના, પૂજ્ય જલારામ બાપા પ્રત્યેનો અહોભાવ અને પાટણ અખિલ રઘુવંશી લોહાણા સમાજની એકતાને મજબૂત બનાવવાના તેમના નિસ્વાર્થ કાર્યને આદરપૂર્વક, અદબપૂર્વક વંદન સહ અભિનંદન
દશ વર્ષ સુધી પરમાર્થ આશ્રમ ઋષિકેશ ખાતે તેમની સાથે રહેવાનો લાભ અનેકજનોને મળ્યો છે. જેથી તેમના સ્વભાવ, સેવાકાર્ય અને પરોપકારથી ઘણા બધા પરિચિત છે જ.શ્રી થરપારકર લોહાણા ચોવીસી મહાજનના પ્રમુખ લીલાધરભાઈ આચાર્ય,પ્રકાશ કલતક ગ્રુપના ખૂબ જ સક્રિય સંચાલક જસવંતભાઈ તન્ના,પાટણ જલારામ મંદિરના ટ્રસ્ટીઓ, આબુરોડ જલારામ મંદિરના ટ્રસ્ટીઓ સહિત અનેક સંસ્થાઓ અને વ્યક્તિઓએ ન્યાલચંદભાઈના ગુણાનુવાદ કરી એમની લાગણી અને ભાવ પ્રગટ કર્યા છે.આવા મહામાનવને શ્રધ્ધાંજલિ આપવા શબ્દો પણ ઓછા પડે છે.
આ દુનિયામાં આવેલા પ્રત્યેક વ્યક્તિને એકને એક દિવસ તો વિદાય લેવાની જ છે.પદ,પૈસો, પ્રતિષ્ઠા, પરિવાર, પરિચિતો બધું જ મૂકીને પરમપિતા પરમાત્માના દરબારમાં હાજર થવાનું છે. જ્યાં માત્ર અને માત્ર પૂન્યકાર્યોની જ પોઝીટીવ નોંધ લેવાય છે.
જગતપિતા પરમ કૃપાળુ પરમાત્મા સદગત ન્યાલચંદભાઈના દિવ્ય આત્માને ચિરશાંતિ આપે, પરિવારજનોને આ કારમો આઘાત સહન કરવાની શક્તિ આપે એવી પ્રભુને પ્રાર્થના સાથે આદરણીય મુરબ્બી ન્યાલચંદભાઈ તન્નાને દિવ્ય શ્રધ્ધાંજલિ.એમના જીવનમાંથી આપણને પણ વધારે ને વધારે નિસ્વાર્થ સેવા કરવાની શક્તિ મળે તેવા સંકલ્પ સાથે આવો સૌ પરમાત્માને ગમે તેવાં કાર્યો કરીએ.
ફરી એકવાર મહામાનવ ન્યાલચંદભાઈ તન્નાને તેમના સુગંધિત, સેવાભાવી, પરોપકારી જીવન માટે કોટિ કોટિ વંદન
ભગવાનભાઈ બંધુ
મોબાઈલ 9825638643