*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:જીવનદર્શન* *ભારત દેશને વિકાસની અભૂતપૂર્વ ઊંચાઈ પર લઈ જનાર યુગપુરુષ નરેન્દ્રભાઇ મોદી આજે વિશ્વ પુરૂષ બની ચૂકયા છે*

જીવનદર્શન
ભારત દેશને વિકાસની અભૂતપૂર્વ ઊંચાઈ પર લઈ જનાર યુગપુરુષ નરેન્દ્રભાઇ મોદી આજે વિશ્વ પુરૂષ બની ચૂકયા છે
જ્યારે જ્યારે ધર્મનો નાશ થાય અને અધર્મનો ઉદય થાય ત્યારે જગતપિતા પરમકૃપાળુ પરમાત્મા કોઈક વ્યક્તિને નિમિત્ત બનાવીને દેશને ઉગારી લે છે.2001થી 2014 સુધી ગુજરાતના વિકાસમાં નિમિત્ત બનેલા માનનીય નરેન્દ્રભાઈ મોદી 2014થી 2025 સુધી ભારત રાષ્ટ્ર માટે અમૃતકાળના સ્વપ્નદ્રષ્ટા,વિકાસના પ્રણેતા અને સુશાસનના દીર્ઘદ્રષ્ટા બન્યા છે.
‘ પ્રારબ્ધને અહીંયાં ગાંઠે કોણ? હું પડકાર ઝીલનારો માણસ છું. હું તેજ ઉછીનું લઉં નહીં, હું જાતે બળતું ફાનસ છું.’ એવી નરેન્દ્રભાઈ મોદીની પોતાની જ કવિતા પૂર્ણપણે પોતે જાતે જ સાર્થક કરી તેઓ આજે વૈશ્વિક પુરુષ બની ચૂકયા છે.1972 માં સંઘના પ્રાંત પ્રચારક આદરણીય લક્ષ્મણરાવ ઈમાનદાર (વકીલ સાહેબ)ના અપાર સ્નેહ, સહકાર અને માર્ગદર્શન થકી સંઘના પ્રચારક બની રાષ્ટ્રનિર્માણની દિશામાં નરેન્દ્રભાઈ મોદીએ એક મકકમ પગલાની શુભ શરૂઆત કરી હતી.ગુજરાતમાં ભાજપ પ્રદેશ સંગઠન મહામંત્રીથી લઈને વડાપ્રધાન સુધીની તેમની સફર ખૂબ જ સંઘર્ષમય રહી છે.તેમણે સમગ્ર જીવન જાણે કે મા ભારતી કાજે અર્પણ કરી દીધું હોય તે રીતે રાષ્ટ્રના વિકાસ માટે તેઓ અથાક પ્રયત્નો નિષ્ઠાપૂર્વક કરી રહેલ છે.
17 સપ્ટેમ્બરે માનનીય નરેન્દ્રભાઈ મોદીનો 75મો જન્મદિવસ હતો.ગુજરાત,ભારત સહિત સમગ્ર વિશ્વના અનેક નેતાઓએ મોદી સાહેબને જન્મદિવસના અભિનંદન આપી એક ગ્લોબલ લીડર તરીકે તેમને માન્યતા આપી છે.તારીખ 7-10-2001 ના રોજ ગુજરાતને એક સબળ અને સક્ષમ નેતૃત્વ નરેન્દ્રભાઈ મોદીના માધ્યમથી મળ્યું હતું.2001થી 2014 સુધી તેઓ ગુજરાતના અણનમ, અડીખમ, અજોડ મુખ્યમંત્રી રહ્યા.અનેક પ્રકારના પડકારો વચ્ચે તેમણે ભાજપ અને ગુજરાતને વધારે મજબૂત બનાવી ગુજરાતનો દષ્ટિસંપન્ન વિકાસ કર્યો.જળ,જન,રક્ષા, ઉર્જા અને જ્ઞાન એમ પંચશકિતને પ્રસ્થાપિત કરી આ દિશામાં અનેક પગલાં ભર્યાં.મજબૂત આયોજન અને મક્કમ નિર્ધાર થકી ગુજરાતને વિકાસની એક નવી દિશા મળતાં સમગ્ર દેશમાં ગુજરાત મોડલની ચર્ચા થવા લાગી.અનેક રાજ્યોનાં પ્રતિનિધિમંડળો ગુજરાતમાં આવ્યાં અને તેમના રાજ્યોમાં પણ ગુજરાતની જેમ યોજનાઓ શરૂ કરી.ભાજપ સંગઠનને પણ અનેક પ્રકારના કાર્યક્રમો આપી મજબૂત બનાવી નવી દિશા આપી.વહીવટીતંત્ર ઉપરની તેમની અતિ મજબૂત પકકડને લીધે તમામ અધિકારીઓ અને કર્મચારીઓ કામે લાગ્યા.શિસ્ત અને સમયબધ્ધતાનું મહત્વ વધ્યું.ભૂતકાળમાં રાજ્યકક્ષાના અનેક કાર્યક્રમો વારંવાર ગાંધીનગરમાં જ થતા હતા તે અલગ અલગ જિલ્લાઓમાં થવા લાગ્યા જેના કારણે દરેક જિલ્લામાં પૂરતો વિકાસ થાય તેવી તકો ઉભી થઇ.રસ્તા,રક્ષા, વીજળી,પાણી, આરોગ્ય, વનીકરણ, રોજગાર, ધાર્મિક સ્થળોનો વિકાસ, રમતગમત,ખેતી, શિક્ષણ,પ્રવાસન, પુરાતત્વ સ્મારકોની જાળવણી, કોમ્પ્યુટરાઈઝેશન એમ તમામ ક્ષેત્રોમાં નવીનીકરણ લાવીને દરેક ક્ષેત્રમાં વિશેષ પ્રગતિ થાય તેવા સફળ પ્રયત્નો કર્યા.તેમના સમયગાળાની ગુજરાતના વિકાસની ગાથા લખવા બેસીએ તો મસમોટું પુસ્તક બની શકે.
2014થી તેમણે ભારત દેશનું સુકાન સંભાળ્યું.અનેક મજબૂત પક્ષો અને મજબૂત નેતાઓને વશમાં કરીને વ્યક્તિગત સ્વાર્થ કે હિતથી ઉપર ઉઠીને માત્ર અને માત્ર ભારત દેશના વિકાસ માટે જ તેમણે ચિંતા, ચિંતન અને નિષ્ઠાપૂર્વક પ્રયત્નો કર્યા.આયુષ્યમાન ભારત, પ્રધાનમંત્રી જનધન યોજના, પ્રધાનમંત્રી ગરીબ કલ્યાણ અન્ન યોજના, સ્વચ્છ ભારત મિશન, સૌભાગ્ય યોજના,જલ જીવન યોજના,સેતુ ભારતમ્ , ડેડિકેટેડ ફ્રેઈડ કોરિડોર્સ, સ્ટેચ્યુ ઓફ યુનિટી, નરેન્દ્ર મોદી સ્ટેડિયમ,અટલ સેતુ બ્રિજ,ચિનાબ રેલ્વે બ્રિજ,ગોજિલા ટનલ, ડિજિટલ ઇન્ડિયા,મેક ઈન ઈન્ડિયા, સ્ટાર્ટ અપ ઇન્ડિયા, પ્રધાનમંત્રી ફસલ બીમા યોજના, સ્ટેન્ડ અપ ઇન્ડિયા,અટલ પેન્શન યોજના, રાષ્ટ્રીય શિક્ષણ નીતિ -2020, પ્રધાનમંત્રી ગતિ શક્તિ માસ્ટર પ્લાન,અટલ ભૂજલ યોજના,રામસર વેટલેન્ડ સાઈટ્સ, મેટ્રો એકસપાન્શન, આયુષ્યમાન વય વંદના કાર્ડ,વંદે ભારત ટ્રેન,આવકવેરા ફેરફાર, ઓપરેશન સિંદૂરની ભવ્ય સફળતા,જીએસટી સુધારા-2025 જેવા અનેક મજબૂત નિર્ણયો થકી ભારત દેશના ગર્વ,ગૌરવ, ગરિમા અને ઉત્થાન માટે તેમણે મક્કમ પગલાં ભર્યાં.દરેક ક્ષેત્રનો વિકાસ થાય તે માટે તેઓ સતત પ્રયત્નશીલ રહ્યા છે.સ્વદેશીના નારાને તેમણે બુલંદ બનાવ્યો છે.
‌‌. નરેન્દ્રભાઈની વિદેશનીતિ ખૂબ જ પ્રેરણાદાયી રહી છે.પાકિસ્તાનને એકલુંઅટુલુ પાડવામાં તેમની દીર્ઘદ્રષ્ટિ કામયાબ રહી છે.75મા વર્ષે તેઓ સંપૂર્ણ તંદુરસ્તી સાથે યુવાનોને પણ શરમાવે તે રીતે સરાહનીય કામગીરી કરી રહેલ છે.પોતે તો યોગ કરે પણ આજે સમગ્ર વિશ્વને યોગમય બનાવવા નવી દિશા આપી છે.રાજકારણમાં અને જાહેરજીવનમાં ઘૂસેલી દારૂ, માંસાહાર, વ્યભિચાર જેવી બદીઓને નેસ્તનાબૂદ કરવામાં તેઓ સફળ રહ્યા છે.તેમની સારી તંદુરસ્તી, મજબૂત ચાલ, સ્પષ્ટ વિચારો, કડક નિર્ણયો,આગવી દૂરંદેશી,બોલવામાં મક્કમતા, મુત્સદ્દીગીરીથી વિશ્ર્વના અનેક દેશોના નેતાઓ અતિ પ્રભાવિત થયા છે.વિશ્ર્વફલક ઉપર જ્યારે બધા દેશના નેતાઓ એક લાઈનમાં ઉભા હોય ત્યારે 56 ઈંચની છાતી ધરાવતા નરેન્દ્રભાઈ મોદી સૌથી અલગ તરી આવે છે.આળસ,હતાશા,નિરાશા,ખાલી વચનો, બેદરકારી જેવી બાબતો તેમના જીવનમાં લેશમાત્ર જોવા મળતી નથી.તેમના હાથે જે કામ કે યોજનાનું ભૂમિપૂજન થાય તેનું ઉદઘાટન પણ તેમના હસ્તે જ થયું હોય તેવા અનેક દાખલાઓ છે.નાનામાં નાના મજૂરથી લઈને તમામ ક્ષેત્રોના વ્યક્તિઓની મુશ્કેલીઓ દૂર થાય તેવા તેમના પ્રયત્નો રહ્યા છે.કોઈપણ પરિવર્તન થાય કે પરંપરા બદલાય ત્યારે કેટલાક માણસોને કેટલીક મુશ્કેલીઓ ચોક્કસ પડે છે પણ અંતે તો બધું સારૂં જ થાય છે.કરોડોની વસ્તી ધરાવતા ભારત દેશને મજબૂત બનાવી વિશ્ર્વફલક ઉપર અગ્રેસર રાખવાનું ખૂબ જ અઘરૂં કામ નરેન્દ્રભાઈ મોદી ખૂબ જ સફળતાપૂર્વક કરી શકયા છે.ભારતના ઔધોગિક ક્ષેત્રોમાં કરોડો લોકોને રોજગારી મળે તેવી શ્રેષ્ઠ માળખાગત સુવિધાઓ ઉપલબ્ધ થઈ છે.
2001થી 2014 ગુજરાતનું સુશાસન અને 2014થી 2025 સુધીના ભારતના સુશાસન માટે નરેન્દ્રભાઈ મોદીએ નિસ્વાર્થભાવે, નિષ્ઠાપૂર્વક પ્રયત્નો કર્યા છે ત્યારે તેમના 75મા જન્મદિવસે આદરપૂર્વક,અદબપૂર્વક, ગૌરવપૂર્વક વંદન સાથે ખૂબ ખૂબ અભિનંદન.તેમના નિરામય સ્વાસ્થ્ય માટે જગતપિતા પરમકૃપાળુ પરમાત્માને પ્રાર્થના તેમજ અઢળક શુભેચ્છાઓ..
ભગવાનભાઈ બંધુ
મોબાઈલ:9825638643