*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:સંઘર્ષ તેમજ કુદરતના આશ્ર્ચર્યનું જીવતું જાગતું પ્રતિક એટલે રાધનપુરનાં પ્રિતીબેન પોપટલાલ ઠક્કર કોટક*

જીવનદર્શન
સંઘર્ષ તેમજ કુદરતના આશ્ર્ચર્યનું જીવતું જાગતું પ્રતિક એટલે રાધનપુરનાં પ્રિતીબેન પોપટલાલ ઠક્કર/કોટક
સુખ અને દુઃખ બેઉ પ્રભુની પ્રસાદી જ છે.ઘણા લોકોના જીવનમાં અતિશય સંઘર્ષ જોવા મળે છે.કુદરતનું કામ કાયમ માટે આશ્ર્ચર્યો સર્જવાનું જ છે.કુદરત કયારેક ઘણું બધું આપે અને કશુંક છીનવી લે જેનાથી માણસ સતત વ્યથિત જ રહે.કયારેક કુદરત ઘણું બધું છીનવી લે અને એવું કશુંક આપે કે જેનાથી માણસનો ઉત્સાહ વધી જાય.આવુ જ એક આશ્ર્ચર્ય એટલે 90 ટકા શારીરિક તકલીફ ધરાવતાં હોવા છતાંયે ખૂબ જ સંઘર્ષ કરીને આગળ વધી રહેલાં રાધનપુરનાં પ્રિતીબેન પોપટલાલ ઠક્કર/કોટક.પિતા પોપટલાલ મણિલાલ ઠક્કર અને માતા મંજુલાબેનના પરિવારમાં તારીખ 29-12-1980 ના રોજ સમી ખાતે જન્મેલાં પ્રિતીબેન ઠક્કરના સમગ્ર સંઘર્ષમય જીવન ઉપર પીએચડી થઈ શકાય તેવું તેમનું પડકારજનક જીવન છે.કુદરત બધું જ લઈ લે પણ જ્યારે મક્કમ મનોબળ આપે ત્યારે જીવન કેવું સુગંધિત બને છે તે જાણવા માટે પ્રિતીબેનનો સંપર્ક અવશ્ય કરવો જ પડે. તેમનું ધોરણ 1 થી 7 નું પ્રાથમિક શિક્ષણ સમી પ્રાથમિક શાળા,જયભારત હાઈસ્કૂલ તેમજ હારિજ ગર્લ્સ હાઈસ્કૂલમાં થયું. આંબેડકર ઓપન યુનિવર્સિટીમાં ઈંગ્લીશ સાથે એમ.એ. કર્યું.શ્રી અમરજ્યોત એજ્યુકેશન ટ્રસ્ટ એટલે કે હિંમત વિધાનગર રાધનપુર ખાતેથી બી.એડ.કર્યુ.રાધનપુર વિસ્તારમાં અંગ્રેજી ભાષાનું વ્યવસ્થિત શિક્ષણ મળે તેવી નાનપણથી જ તેમની તમન્ના હતી.તેમના બેઉ ભાઈઓ જગદીશભાઈ, રવિભાઈ,ભાભીઓ દીપ્તિબેન, જાનકીબેન,બહેનો નયનાબેન,કિરણબેન સહિતનું સમગ્ર પરિવાર પ્રિતીબેનની શૈક્ષણિક ઈચ્છા અને ઉજ્જવળ ભવિષ્યમાં હરહંમેશ સાથસહકાર અને માર્ગદર્શન આપતું જ રહ્યું છે.શારીરિક તકલીફો હોવા છતાંયે પરિવારના નિરંતર ટેકાથી પ્રિતીબેનનું મનોબળ અતિ મજબૂત બન્યું છે.
માત્ર બે‌ વર્ષની નાની ઉંમરે જ પોલિયો થતાં પ્રિતીબેન 90 ટકા શારીરિક રીતે ડીસએબીલીટી ધરાવતાં થઈ ગયાં.આવા કપરા સંજોગોમાંય શ્રીમદ્ ભાગવત ગીતાનું સતત વાંચન તેમને ખૂબ જ મદદરૂપ બન્યું.તેઓ નકારાત્મકતાથી જોજનો દૂર છે.ધોરણ 12 પછી નર્મદા કિનારે રહેતા પૂજ્ય જ્યોતિર્મયાનંદજી મહારાજના સંપર્કમાં આવતાં તેમના પણ આશીર્વાદ મળ્યા.એક અસામાન્ય વ્યક્તિ પણ કેવડું મોટું કામ કરી શકે તે જોવા અને જાણવા માટે પ્રિતીબેનના સમગ્ર જીવનનો અભ્યાસ કરવો ખૂબ જ મહત્વપૂર્ણ અને જરૂરી છે.આજના વર્તમાન સમયમાં સર્વ પ્રકારે સક્ષમ યુવાનો કે યુવતીઓ સામાન્ય મુશ્કેલીઓ વખતે નકારાત્મક વિચારોને લીધે પોતાના સમગ્ર જીવનને બરબાદ કરી નાખે છે અને ક્યારેક તો આત્મહત્યા જેવું આત્યંતિક પગલું પણ ભરે છે.નાની નાની વાતોમાં નિરાશ થઈ જતા યુવા જગત માટે પ્રિતીબેન આઈકોન સમાન છે.સંઘર્ષભરી જિંદગીથી હતાશ થયેલા અનેક માણસો માટે પ્રિતીબેન રોલ મોડેલ છે.
પ્રિતીબેને પોતાનો અભ્યાસ પૂર્ણ કર્યા બાદ વ્યવસાયિક કારકિર્દીની શરૂઆત કરી.સૌપ્રથમ 2002 માં અંગ્રેજીના ટયુશન કલાસીસ ચાલુ કર્યા.2012 માં કીડઝીની ફ્રેન્ચાઈસી લીધી અને કીડઝી સ્કૂલ ચાલુ કરી જે 10 વર્ષ સુધી ચલાવી.કીડઝી સ્કૂલથી સંતોષ ના થતાં છેલ્લા ચાર વર્ષથી પોતાની જ હેપ્પી જમ્પર પ્રિસ્કૂલ ચાલુ કરી જે સરસ ચાલે છે.એમની આ સ્કૂલમાં પ્રિસ્કૂલ નર્સરી, જુનિયર કે.જી., સીનીયર કે.જી.,પ્લે ગ્રુપ એમ અલગ અલગ વિભાગનાં બાળકો અભ્યાસ કરે છે.સમગ્ર સ્કૂલ ઈંગ્લીશ મીડિયમમાં જ ચાલે છે.તેઓ સવારે 8=00 થી 12=30 સ્કૂલ ચલાવે છે અને પછી બપોરે 3=30 થી 5=30 ટયુશન કલાસીસ ચલાવે છે.સહકાર સમગ્ર પરિવારનો મળે છે પણ જગતપિતા પરમકૃપાળુ પરમાત્માની તેમના ઉપર અસીમ કૃપા છે તેવું તેઓ માને છે.બહાર ક્યાંય પ્રવાસ કરવાનો હોય કે સંજોગોવશાત પ્રસંગોમાં જવાનું હોય તો ગાડી તેમજ ડ્રાયવર સાથે લઈને તેઓ જાય છે.
તેમની સ્કૂલની મુલાકાતે અવારનવાર અનેક મહાનુભાવો આવતા રહે છે.પૂજ્ય સ્વામી નિજાનંદજી ગોતરકાવાળા,રાધનપુરના ધારાસભ્ય લવિંગજી સોલંકી, અમરજ્યોત એજ્યુકેશન ટ્રસ્ટ રાધનપુરના પ્રમુખ ડો. મહેશભાઈ મુલાણી,એમ.ડી.રાયચંદભાઈ ઠક્કર સહિત વિવિધ મહાનુભાવોએ તેમની સ્કૂલની મુલાકાત લઈ પૂરતું પ્રોત્સાહન પૂરું પાડ્યું છે.પ્રિતીબેન વ્હીલચેરનો ઉપયોગ કરીને પણ સતત સક્રિય રહે છે.અંગ્રેજીના તેમના ટયુશન કલાસીસ દર મંગળવારે ઓનલાઇન તેમજ દર ગુરૂવારે ઓફલાઈન ચાલુ હોય છે.જગતપિતા પરમકૃપાળુ પરમાત્માનો થોડોક વધારે સાથ, સહકાર અને આશીર્વાદ મળે તો ભવિષ્યમાં રાધનપુર ખાતે ખાસ અંગ્રેજી વિષય માટે મોટી સ્કૂલ ચાલુ કરવાની તેમની પ્રબળ ઈચ્છા છે.તેમની શાળા હાલ ભાડાના મકાનમાં ચાલે છે અને સાત જણનો સ્ટાફ છે.અમરજ્યોત એજ્યુકેશન ટ્રસ્ટ એટલે કે હિંમત વિધાનગર રાધનપુરની બાજુમાં જ હાલ તેમની સ્કૂલ ચાલુ છે.
તાજેતરમાં જ અલગ અલગ બે સામાજિક પ્રસંગોમાં તેમના બેઉ ભાઈઓ જગદીશભાઈ અને રવિભાઈને મળવાનું થયું ત્યારે પ્રિતીબેનના સંઘર્ષમય જીવન તેમજ તેમના પ્રેરણાદાયી ઉત્સાહ વિષે થોડી વાતો થઈ.ડીસામાં રહેતા અમારા પરમ મિત્ર મૂળ સમીના વતની એવા રાજુભાઈ જયંતીલાલ કોટક પણ પારિવારિક રીતે પ્રિતીબેનના ભાઈ થાય અને તેથી તેમની પાસેથી પણ પ્રિતીબેનની કામગીરી વિષે થોડીક અલપઝલપ વાતો થઈ.અનેકજનોને વિશેષ માર્ગદર્શન અને પ્રોત્સાહન મળે તેવા હેતુથી મેં તાત્કાલિક પ્રિતીબેન કોટકનો રાધનપુર ખાતે ટેલિફોનીકલી સંપર્ક કરી થોડીક વિગતો મેળવી અને આજે જીવનદર્શન કોલમના માધ્યમથી આપ સૌ સુધી પહોંચાડવાનો નમ્ર પ્રયાસ કર્યો છે.ગમે તેટલી મુશ્કેલીઓ વચ્ચે પણ એક અડગ, હોનહાર, મક્કમ મનોબળ ધરાવતી દીકરી કેટલું સરસ કામ કરી શકે છે તે વાત સૌ સુધી પહોંચે તેવા શુભ આશયથી આ લેખ લખતાં મને પણ વિશેષ આનંદ થયો છે.પ્રિતીબેન કોટકને અભિનંદન આપવા તેમનો મોબાઈલ નંબર 8401566700 તેમજ 9429528176 છે.રાધનપુર લોહાણા સમાજ,શ્રી લોહાણા મહા પરિષદ કે ગુજરાત સરકારે પ્રિતીબેનની અદભૂત સમાજલક્ષી, શિક્ષણલક્ષી પ્રેરણાદાયી કામગીરીને ધ્યાનમાં લઈને તેમને સન્માનિત કરી પ્રોત્સાહન આપવાની ખાસ જરૂર છે.કેટલાક દિવ્યાંગ પ્રભુજનોના ખેલ જગતના કે તેમના વ્યકિતગત જીવનના વિડિયો જોઈએ ત્યારે આનંદ અને આશ્ર્ચર્ય થાય છે.પ્રિતીબેન પણ આમાંનાં જ એક છે.તેમની કામગીરી વંદનીય, અભિનંદનીય, અનુકરણીય, સરાહનીય અને અનુમોદનીય છે.
કુદરતે આપેલી મુશ્કેલીઓને પ્રભુનો પ્રસાદ સમજી મક્કમ મનોબળથી નિરંતર કામ કરનાર પ્રિતીબેન ઠક્કરને કોટિ કોટિ વંદન.. ખૂબ ખૂબ અભિનંદન તેમજ ઉજ્જવળ ભવિષ્ય માટે અઢળક શુભેચ્છાઓ….
ભગવાનભાઈ બંધુ
ડીસા – બનાસકાંઠા
મોબાઈલ:7984481168