*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:મોરબી 𝐑𝐓𝐎 દ્વારા ટુ-વ્હીલર અને ફોર-વ્હીલર વાહનોની જૂની સીરીઝના બાકી નંબરો માટે ઓનલાઈન હરાજી જાહેર*

*મોરબી RTO દ્વારા ટુ-વ્હીલર અને ફોર-વ્હીલર વાહનોની જૂની સીરીઝના બાકી નંબરો માટે ઓનલાઈન હરાજી જાહેર*

*પસંદગીના ગોલ્ડન અને સિલ્વર નંબરો મેળવવા ઈચ્છતા વાહન માલિકો તા. ૦૫ થી ૦૭ મે દરમિયાન ઓનલાઈન પોર્ટલ પર ભાગ લઈ શકશે*

*મોરબી, તા. ૩૦ એપ્રિલ,*

સરકારશ્રીના મોટર વાહન ખાતાના આદેશાનુસાર, વાહન માલિકોને પસંદગીના નંબરો ફાળવવાની પ્રક્રિયાને વધુ સરળ, નિષ્પક્ષ અને પારદર્શક બનાવવા માટે મોરબી આર.ટી.ઓ. કચેરી દ્વારા વિવિધ સીરીઝના બાકી રહેલા નંબરો માટે ઓનલાઈન હરાજી (e-Auction) નું આયોજન કરવામાં આવ્યું છે. ટુ-વ્હીલર, ફોર-વ્હીલર અને ટ્રાન્સપોર્ટ વાહનોની જૂની સીરીઝના ગોલ્ડન અને સિલ્વર કેટેગરીના નંબર મેળવવા ઈચ્છતા વાહન માલિકો આ પ્રક્રિયામાં ભાગ લઈ શકશે.

ટુ-વ્હીલર માટે GJ36BC, BA, AS, AQ, AN, AM, ફોર-વ્હીલર માટે GJ36BB, AR, AL, AP, AJ અને ટ્રાન્સપોર્ટ વાહનો: GJ36V, GJ36X સિરીઝના નંબર મેળવવા તા. ૦૫/૦૫/૨૦૨૬ થી તા. ૦૭/૦૫/૨૦૨૬ સુધી ઓનલાઈન અરજી અને પાયાની રકમ ભરી શકાશે. ઓનલાઈન બિડિંગ (હરાજી) નો સમય: તા. ૦૭/૦૫/૨૦૨૬ થી તા. ૦૯/૦૫/૨૦૨૬ સુધીનો રહેશે. ઇચ્છુક અરજદારોએ http://parivahan.gov.in/fancy/ પોર્ટલ પર જઈ ‘પબ્લિક યુઝર’ તરીકે નોંધણી કરાવવાની રહેશે. ત્યારબાદ લોગિન કરી CNA (Choice Number Application) ફોર્મ ભરી યુનિક નંબર જનરેટ કરવાનો રહેશે. નોંધનીય છે કે, CNA ફોર્મ વાહન ખરીદી અથવા વીમાની તારીખ (જે વહેલું હોય તે) થી ૭ દિવસની અંદર અને વાહનનો ટેક્સ ભર્યા બાદ જ ભરી શકાશે.

હરાજીમાં સફળ થયેલા ઉમેદવારોએ બાકી રહેતી તફાવતની રકમ પાંચ દિવસમાં ઓનલાઈન ભરવાની રહેશે, અન્યથા તેમને ડિસ-ક્વોલિફાય કરવામાં આવશે. હરાજીમાં અસફળ રહેલા અરજદારોની રકમ ૫ થી ૭ દિવસમાં તેમના બેંક ખાતામાં ઓનલાઈન પરત જમા કરી દેવામાં આવશે. સફળ ઉમેદવારોએ પેમેન્ટની પહોંચ અને એલોટમેન્ટ પત્ર મેળવી આર.ટી.ઓ. કચેરી ખાતે જમા કરાવવાનું રહેશે તેમ મોરબી પ્રાદેશિક પરિવહન અધિકારીશ્રીની યાદીમાં જણાવાયું છે.