*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:વિશ્વ આરોગ્ય દિવસ નિમિત્તે કુંભારિયા ગામે જય ભારત સેવા ટ્રસ્ટ, પ્રાથમિક આરોગ્ય કેન્દ્ર ખાખરેચી તથા પરાસર ક્લિનિક ખાખરેચીના સહયોગથી આરોગ્ય કેમ્પનું સફળ આયોજન કરાયું*

(*અમીત રાઠોડ દ્વારા*) આજ રોજ તા. 07/04/2026 ના રોજ વિશ્વ આરોગ્ય દિવસ નિમિત્તે કુંભારિયા ગામે મુખ્ય જિલ્લા આરોગ્ય અધિકારી શ્રી ની સુચના તથા માર્ગદર્શન હેઠળ જય ભારત સેવા ટ્રસ્ટ, પ્રાથમિક આરોગ્ય કેન્દ્ર ખાખરેચી તથા પરાસર ક્લિનિક ખાખરેચી તથા મોબાઈલ હેલ્થ યુનિટ માળીયાના સહયોગથી આરોગ્ય કેમ્પનું સફળ આયોજન કરવામાં આવ્યું હતું.

આ કેમ્પમાં ગામજનોને સર્વાંગી આરોગ્ય સેવાઓ પૂરી પાડવામાં આવી હતી. જેમાં ડાયાબિટીસ (શુગર) તપાસ, બ્લડ પ્રેશર (BP) તપાસ, સગર્ભા બહેનોની વિશેષ તપાસ, હિમોગ્લોબિન (HB) તપાસ તેમજ વિવિધ લેબોરેટરી ટેસ્ટ કરવામાં આવ્યા હતા. સગર્ભા બહેનોને જરૂરી માર્ગદર્શન, પોષણ અંગે સલાહ તથા સમયસર ચેકઅપ અંગે માહિતગાર કરવામાં આવ્યા હતા.

કેમ્પ દરમિયાન અલગ અલગ રોગો માટે OPD સેવાઓ પણ આપવામાં આવી હતી, જેમાં તાવ, શરદી-ખાંસી, ત્વચા સંબંધિત રોગો, સાંધાના દુખાવા, કમરના દુખાવા તથા અન્ય સામાન્ય રોગો માટે નિદાન અને સારવાર આપવામાં આવી હતી.

આ ઉપરાંત પરાસર ક્લિનિકના ડૉ. પ્રતિક કૈલા(BAMS, CCH) દ્વારા આયુષ તબીબી નિદાન અને સારવાર આપવામાં આવી હતી. ખાસ કરીને દુખાવાના દર્દીઓને અગ્નિકર્મ પદ્ધતિ દ્વારા સારવાર આપવામાં આવી હતી, જેના કારણે દર્દીઓને રાહત અનુભવાઈ હતી. સાથે જ આયુર્વેદિક પદ્ધતિ અંતર્ગત પંચકર્મ, અગ્નિકર્મ તથા યોગ-પ્રાણાયામ જેવી વિવિધ સારવાર પદ્ધતિઓ વિશે માહિતી આપી લોકોને સ્વસ્થ જીવનશૈલી તરફ પ્રેરિત કરવામાં આવ્યા હતા.

કેમ્પ દરમિયાન ABHA કાર્ડ બનાવવાની કામગીરી તથા આયુષ્માન કાર્ડ સંબંધિત માર્ગદર્શન અને નોંધણી કરવામાં આવી હતી, જેના દ્વારા ગામજનોને ભવિષ્યમાં આરોગ્ય સેવાઓ સરળતાથી પ્રાપ્ત થાય તે માટે પ્રયત્ન કરવામાં આવ્યો હતો.

વિશેષરૂપે, 108 એમ્બ્યુલન્સ સેવા વિશે લોકોમાં જાગૃતિ ફેલાવવામાં આવી હતી. 108 સેવા કેવી રીતે ઉપયોગી છે, ઇમરજન્સી સમયમાં કેવી રીતે સંપર્ક કરવો તથા સમયસર સારવાર મેળવવાની પ્રક્રિયા વિશે વિગતવાર માહિતી આપવામાં આવી હતી. સાથે જ 108 એમ્બ્યુલન્સનો ડેમો આપી લોકોને પ્રત્યક્ષ સમજ આપવામાં આવી હતી.

કેમ્પમાં ગામજનોનો ઉત્તમ પ્રતિસાદ મળ્યો હતો અને મોટી સંખ્યામાં લોકોએ વિવિધ આરોગ્ય સેવાઓનો લાભ લીધો હતો. આ પ્રસંગે આરોગ્ય અંગે જાગૃતિ ફેલાવવા, સ્વચ્છતા, પોષણ અને સમયસર સારવારના મહત્વ અંગે માર્ગદર્શન આપવામાં આવ્યું હતું.

અંતમાં, આયોજક સંસ્થાઓ દ્વારા તમામ ગામજનોને આરોગ્ય પ્રત્યે જાગૃત રહેવા તથા આવી સેવાઓનો વધુમાં વધુ લાભ લેવા અપીલ કરવામાં આવી હતી.