ટંકારા : ટંકારામાં “તુ અમને ખોટી રીતે કેમ બદનામ કરે છે” કહી માતા-પુત્ર પર હુમલો કર્યાનો બનાવ સામે આવ્યો છે. જેમાં ચાર શખ્સોએ માર મર્યાની ટંકારા પોલીસ મથકે ફરિયાદ નોંધાતા પોલીસે વધુ તપાસ હાથ ધરી છે. આ બનાવની ટંકારા પોલીસ સ્ટેશનેથી પ્રાપ્ત વિગતો અનુસાર ફરિયાદી મહેશભાઇ મગનભાઇ વામજા (ઉ.વ.૪૭, ધંધો-નિવૃત, રહે.લજાઇ ગામ, બસ સ્ટેશન પાસે, તા.ટંકારા) એ આરોપીઓ કેતન વામજા, વિશાલ દિનેશ દેત્રોજા, મુકેશ વાધજી, શંભુ મહિપતભાઇ વામજા (રહે.બધા લજાઇ, તા.ટંકારા) સામે ફરિયાદ નોંધાવી હતી કે, ગત તા.૨૮ ના રોજ રાત્રીના સાડા આઠેક વાગ્યાના અરસામા લજાઈ ગામ બસ સ્ટેશન પાસે ફરીયાદીના રહેણાક મકાન પાસે આરોપીઓએ ફરીયાદીને કહેલ કે તુ અમને ખોટી રીતે કેમ બદનામ કરે છે તેમ કહી ફરીયાદી તથા સાહેદ ફરીયાદીના માતાને લાકડાના ધોકાથી તથા ઢીકાપાટુનો મુંઢ માર મારી ગાળો બોલી જાનથી મારી નાખવાની ધમકી આપી હતી. આ બનાવની ટંકારા પોલીસે ફરિયાદ નોંધી આગળની તપાસ હાથ ધરી છે.
