*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:જીવનદર્શન* *𝟖𝟒 વર્ષની ઉંમરે 𝐏𝐇𝐃ની પદવી પ્રાપ્ત કરી યુવાનોને આગવી પ્રેરણા પૂરી પાડતા રાધનપુરના ધીરૂભાઈ ઠક્કર (પંપવાળા)*

જીવનદર્શન
84 વર્ષની ઉંમરે PHDની પદવી પ્રાપ્ત કરી યુવાનોને આગવી પ્રેરણા પૂરી પાડતા રાધનપુરના ધીરૂભાઈ ઠક્કર (પંપવાળા)
અભ્યાસ,સેવા, સંઘર્ષ, મહેનત કે પ્રગતિને ઉંમર સાથે કોઈ જ લેવાદેવા નથી.જો માણસ ધારે તો કોઈપણ ઉંમરે શૂન્યમાંથી સર્જન કરી શકે છે.ખૂબ જ ધીરજવાળા,હસમુખા, નિજાનંદી, પરોપકારી, ખૂબ જ પોઝીટીવ, સેવાભાવી, માનવતાવાદી, ધાર્મિક એવા રાધનપુરના ધીરૂભાઈ પરષોત્તમદાસ ઠક્કરનો જન્મ 18-4-1941 ના રોજ હારિજ ખાતે થયેલ.આદર્શ વિદ્યામંદિર હારિજ ખાતેથી તેમણે 1958માં ઓલ્ડ એસ.એસ.સી.નો અભ્યાસ પૂર્ણ કરેલ.1961માં પોસ્ટ ઓફિસમાં સર્વિસ ચાલુ કરી.થોડાક સમયમાં જ રાજીનામું આપી રાધનપુરમાં પેટ્રોલ પંપનો વ્યવસાય શરૂ કર્યો.માણસ પાસે કુદરત શું કરાવવા માગે છે તેનો કોઈ જ વ્યક્તિને ક્યારેય ખ્યાલ આવતો નથી.પેટ્રોલ પંપના વ્યવસાયમાં ભારત પેટ્રોલિયમ કોર્પોરેશન લિમિટેડ તરફથી શ્રેષ્ઠ બિઝનેસ ગ્રોથ માટે ધીરૂભાઈને અનેકવાર પુરસ્કાર પ્રાપ્ત થયેલ છે.પેટ્રોલિયમ વ્યવસાયમાં અવિરત પરિશ્રમ બદલ ભારત પેટ્રોલિયમ કોર્પોરેશન તરફથી તેમને લાઈફ ટાઈમ અચિવમેન્ટ એવોર્ડ પણ પ્રાપ્ત થયેલ છે.શ્રી રઘુવંશી લોહાણા સમાજની વિશ્ર્વ કક્ષાની સેવાભાવી સંસ્થા શ્રી લોહાણા મહા પરિષદ દ્વારા 2009માં તેમને સમાજસેવા માટે સમાજરત્ન એવોર્ડથી સન્માનિત કરવામાં આવ્યા હતા.ખૂબ જ ચીવટ અને સફળતાપૂર્વક પોતાનો વ્યવસાય કરનાર ધીરૂભાઈએ આજદિન સુધી પોતાના સંબંધોને પણ ખૂબ જ ચીવટ અને સફળતાપૂર્વક સાચવ્યા છે.
જીવનમાં ગમે તે ઉંમરે વળાંક આવે તેમ ધીરૂભાઈના જીવનમાં 2016માં અચાનક ટર્નિગ પોઈન્ટ આવ્યો.1959માં શિક્ષણ જગતને અલવિદા કર્યા બાદ 75 વર્ષની ઉંમરે એટલે કે 2016માં તેમણે ધોરણ 12 ની પરિક્ષા આપી અને પાસ થયા.2019માં સોશીયોલોજી વિષય સાથે બી.એ.કર્યુ.2021માં સોશીયોલોજી વિષય સાથે એમ.એ.કર્યુ.ખૂબ જ આનંદ, ગર્વ અને ગૌરવની ઘટના તો ત્યારે બની કે તારીખ 6-9-2025ના રોજ 84 વર્ષની ઉંમરે તેમણે પીએચડીની પદવી સાથે પ્રેરણાદાયી સિધ્ધિ હાંસલ કરી.તારીખ 14-9-2025 રવિવારે શ્રી લોહાણા મહા પરિષદના ગ્લોબલ સરસ્વતી સન્માન સમારંભમાં અમદાવાદ ખાતે તેમનું સન્માન થયું ત્યારે સૌ પરિવારજનો, સ્નેહીજનો, મિત્રો, પરિચિતો એમ સૌએ વિશેષ આનંદની લાગણી વ્યક્ત કરી.ડોકટર ધીરૂભાઈએ એ સાબિત કરી બતાવ્યું કે જો હાંસલો બુલંદ હોય તો ઉંમર કયારેય બાધારૂપ બનતી નથી.84 વર્ષે પણ યુવાનોને શરમાવે તેવી તેમની સ્ફૂર્તિ અને આગળ વધવાની મહેચ્છા છે.
તેઓ કચ્છ વાગડ લોહાણા મહાજન વાડી રાધનપુરના તેમજ કચ્છ વાગડ લોહાણા મહાજન રાધનપુરના સફળ પ્રમુખ રહી ચૂક્યા છે.સમગ્ર ભારત લેવલે કાર્યરત શ્રી અખિલ કચ્છ વાગડ લોહાણા મહાજનના પ્રમુખ તરીકે તેઓ સેવા આપી ચૂક્યા છે.રાધનપુરમાં માનનીય હિંમતલાલ મુલાણી, માનનીય રાયચંદભાઈ ઠક્કર અને માનનીય ધીરૂભાઈ ઠક્કર ત્રિપુટીની મિત્રતા તેમજ એકબીજા પ્રત્યેની વફાદારી ખૂબ જ વખણાય.માનનીય મુલાણી સાહેબ દ્વારા જેની સ્થાપના કરવામાં આવી એવા શ્રી અમરજ્યોત એજ્યુકેશન ટ્રસ્ટ, હિંમત વિધાનગર, રાધનપુરમાં ધીરૂભાઈ ઠક્કર હાલમાં ખજાનચી તેમજ ટ્રસ્ટી છે. વર્તમાનમાં પણ પ્રમુખ શ્રી મહેશભાઈ મુલાણી સાથેનું તેમનું ટયુનીંગ સરાહનીય છે. સર્વોદય આરોગ્ય નિધિ, રાધનપુર સંચાલિત ભોજનાલય સમિતિના તેઓ પ્રમુખ છે.ગાયત્રી મંદિર રાધનપુરના તેઓ જમીનદાતા તેમજ મેનેજીંગ ટ્રસ્ટી છે.શ્રી લોહાણા મહા પરિષદની મધ્યસ્થ કારોબારીના સભ્ય છે.
વ્યવસાયમાં શ્રેષ્ઠતા, સમાજસેવામાં અગ્રેસરતા અને અભ્યાસમાં અદમ્ય જિજ્ઞાસા ધરાવતા ધીરૂભાઈ એક મૂઠી ઊંચેરા માનવી છે.પરમપિતા પરમાત્માએ આપેલી સંપતિ સત્કાર્યોમાં વાપરીને તેનો સાચો સદઉપયોગ કરવાની નિપુણતા તેઓ સુપેરે ધરાવે છે.સમગ્ર માનવસમાજ તેમજ ખાસ કરીને વિધાર્થીઓ માટે ધીરૂભાઈનું જીવન પ્રેરણાસ્ત્રોત સમાન છે.84 વર્ષની ઉંમરે મક્કમ નિર્ધાર તેમજ વિશિષ્ટ મનોબળ સાથે પીએચડી થનાર ધીરૂભાઈના જીવનકવન ઉપર પણ ભવિષ્યમાં કોઈક વિધાર્થી પીએચડી કરશે તો નવાઈ નહીં જ લાગે.
તેઓ ખાખચોક રામજી મંદિર રાધનપુરના ટ્રસ્ટી તેમજ ઘટા પરિવાર ચામુંડા માતાજી મંદિર બેલાના મેનેજીંગ ટ્રસ્ટી છે.રાધનપુર નગર પંચાયતના સભ્ય તેમજ ઓકટ્રોય સમિતિના ચેરમેન રહી ચૂકયા છે.શ્રી જલારામ રઘુવંશી લોહાણા કન્યા છાત્રાલય રાપરના કારોબારી સભ્ય છે.લોહાણા મહા પરિષદ, અખિલ ગુજરાત લોહાણા સમાજ,વેપારી મહામંડળ રાધનપુર,જી.આઈ.ડી.સી.એસોસિએશન રાધનપુર, લાયન્સ ક્લબ રાધનપુર, ઔધોગિક તાલીમ સંસ્થા રાધનપુર, ફેડરેશન ઓફ ગુજરાત પેટ્રોલિયમ ડીલર એસોસિએશન,જે.પી.કુમાર શાળા રાધનપુર , લોહાણા પ્રગતિ મંડળ રાધનપુર,ઓલ ઈન્ડિયા પોસ્ટલ એમ્પ્લોઇઝ યુનિયન, પોસ્ટ એન્ડ ટેલિગ્રામ પાલનપુર વિભાગ, ગુજરાત લોહાણા સુધારણા સમિતિ, ચામુંડાનગર કો.ઓ.હા.સો.લી.રાધનપુર સહિત અનેક સંસ્થાઓમાં કોઈ ને કોઈ હોદાના માધ્યમથી જવાબદારી સંભાળી મહત્વપૂર્ણ સેવા આપી ચૂક્યા છે.વિનય,વાણી,વિવેક, વ્યવહારથી તેમણે સંબંધોની અનોખી માવજત કરી છે.માનનીય ધીરૂભાઈ 75 વર્ષના થયા ત્યારે તેમની જીવન ઝરમરને વ્યકત કરતું પ્રેરણાદાયી પુસ્તક લખાયું હતું જેનું સંપાદન જાણીતા શિક્ષણવિદ -સાહિત્યકાર કનુભાઈ આચાર્ય તેમજ સહસંપાદન ભગવાનભાઈ બંધુ દ્રારા કરવામાં આવ્યું હતું.
જગતપિતા પરમકૃપાળુ પરમાત્માએ આ દુનિયામાં મોકલ્યા છે એટલે જીવવું તો પડશે જ પણ ધીરૂભાઈની જીવન જીવવાની રીત કંઇક અનોખી, નિજાનંદી,પરોપકારી અને પ્રેરણાદાયી છે…
શ્રી ધીરૂભાઈને તેમની આગવી સિધ્ધિ બદલ આદરપૂર્વક વંદન સહ અભિનંદન તેમજ નિરામય દીર્ઘાયુ માટે અઢળક શુભેચ્છાઓ..
ભગવાનભાઈ બંધુ
મોબાઈલ:9825638643