*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:જીવનદર્શન* *ભારત દેશની એકતા, અખંડિતતા અને મજબૂતાઈ માટે સક્રિય રાષ્ટ્રીય સ્વયંસેવક સંઘનું પ્રેરણાદાયી શતાબ્દિ મહોત્સવ વર્ષ*

જીવનદર્શન…
ભારત દેશની એકતા, અખંડિતતા અને મજબૂતાઈ માટે સક્રિય રાષ્ટ્રીય સ્વયંસેવક સંઘનું પ્રેરણાદાયી શતાબ્દિ મહોત્સવ વર્ષ
પ્રખર રાષ્ટ્રીય ભાવનાથી કામ કરતી અનેક વંદનીય સંસ્થાઓ ભારત દેશમાં છે.આ બધામાં રાષ્ટ્રીય સ્વયંસેવક સંઘનું નામ સૌથી અગ્રેસર છે.27 સપ્ટેમ્બર 1925 વિજયાદશમીના અતિ પવિત્ર દિવસે આપણા દેશના પનોતા પુત્ર ડો.કેશવ બલીરામ હેડગેવારજી દ્રારા જેની સ્થાપના કરવામાં આવી એવા સંપૂર્ણ રાષ્ટ્રવાદી સંગઠન આર.એસ.એસ.ને આ વર્ષે 2025 માં 100 વર્ષ પૂર્ણ થાય છે.સમગ્ર ભારત દેશ ઉપરાંત વિશ્વના કેટલાક દેશોમાં પણ સંઘના 100 વર્ષ નિમિત્તે સરાહનીય, અભિનંદનીય, અનુકરણીય,અનુમોદનીય, શાનદાર ઉજવણી થઈ રહી છે.આ ઉજવણી થકી ભારત રાષ્ટ્રને વધારે મજબૂત બનાવવાનો મક્કમ સંકલ્પ થઈ રહેલ છે.ભારત અને હિંદુઓ માટે ભગવાન સમાન પૂજય હેડગેવારજીનો જન્મ 1-4-1989 ના રોજ થયેલ.સંઘ જેવી રાષ્ટ્રવાદી સંસ્થાની સ્થાપના કરી, યોગ્ય સંચાલન થકી તેને મજબૂત બનાવી તેઓ 21-6-1940 ના રોજ પરમપિતા પરમાત્માની ગોદમાં કાયમ માટે સમાઈ ગયા.સંઘની સ્થાપના વખતે પાયાના મુખ્ય પાંચ જ સ્વયંસેવકો હતા. જેમાં ડો.કેશવ બલીરામ હેડગેવારજી, ભૈયાજી દાણી, બાલાસાહેબ આપ્ટે, બાલાસાહેબ દેવરસ અને મધુકરરાવ ભાગવત મુખ્ય હતા.
રાષ્ટ્રીય સ્વયંસેવક સંઘના સરસંઘચાલક તરીકે 1925 થી 1940 સુધી ડો.કેશવરામ બલીરામ હેડગેવારજીએ જવાબદારી સંભાળી હતી.એ પછી 1940 થી 1973 સુધી માધવ સદાશિવરાવ ગોલવલકરજી (ગુરૂજી),1973 થી 1993 સુધી મધુકર દતાત્રેયજી (બાલાસાહેબ દેવરસજી),1993 થી 2000 સુધી પ્રોફેસર રાજેન્દ્રસિંહજી (રજ્જુભૈયાજી),2000 થી 2009 સુધી કૃપાહલ્લી સીતારામૈયા સુદર્શનજી(કે.સુદર્શનજી) તેમજ 2009 થી આજ સુધી ડો.મોહનરાવ મધુકરરાવ ભાગવતજી ખૂબ જ સફળતાપૂર્વક આ જવાબદારી વહન કરી રહેલ છે.સંઘમાં સરકાર્યવાહ તરીકે અનેક મહાનુભાવોએ જવાબદારી નિભાવી છે.સંઘમાં આજીવન પ્રચારકો તરીકે પણ પોતાનું સમગ્ર જીવન રાષ્ટ્ર હેતુ સમર્પિત કરનાર અનેક આદરણીય મહાનુભાવો છે.સંઘના સંગઠન તંત્રમાં સ્વયંસેવકથી લઈને છેક ઉપર સુધી અલગ અલગ જવાબદારી નિભાવતા વિવિધ સમર્પિત પદાધિકારીઓ હોય છે.માત્ર પાંચ જ પૂજનીય મહાનુભાવોથી 1925 માં શરૂ થયેલ સંઘ આજે વટવૃક્ષ બની ચૂકેલ છે.સમગ્ર ભારત દેશમાં હાલમાં રાષ્ટ્રીય સ્વયંસેવક સંઘની 60 હજાર જેટલી શાખાઓ કાર્યરત છે.60 લાખ જેટલા સમર્પિત સ્વયંસેવકો નિયમિત શાખામાં જાય છે.સંઘ સંચાલિત 30 હજાર જેટલાં વિદ્યામંદિરો છે.3 લાખ આચાર્ય અને 50 લાખ વિદ્યાર્થીઓ છે.આર.એસ.એસ.ના વિચારોથી પ્રેરાઈને રાજકીય રીતે સક્રિય એવા ભારતીય જનતા પાર્ટીના 17 કરોડ જેટલા પ્રાથમિક સભ્યો છે.બજરંગદળના 3 લાખ હિંદુ સ્વયંસેવકો છે.આર.એસ.એસ.ના કારણે જ 16 જેટલાં રાજ્યોમાં ભાજપ શાસિત સરકારો છે.વિશ્વ હિંદુ પરિષદના 70 લાખ જેટલા સમર્પિત સભ્યો છે.આર.એસ.એસ.ના વિચારોથી સંપૂર્ણ સજ્જ એવા 303 સંસદસભ્યો અને 1460 જેટલા ધારાસભ્યો છે.ભારત દેશના નખશીખ રાષ્ટ્રવાદી પ્રધાનમંત્રી પરમ આદરણીય નરેન્દ્ર મોદીજી આર.એસ.એસ.ના રંગે સંપૂર્ણ રંગાયેલા છે.
અમારા પરમ મિત્ર, ખૂબ જ જાગૃત,સંઘના સ્વયંસેવક, અનેક સંસ્થાઓ સાથે ઘનિષ્ઠ રીતે સંકળાયેલા ડીસાના બળદેવભાઇ રાયકાએ “સંઘકે 100 સાલ ” એવું ખૂબ જ સરસ, પ્રેરણાદાયી અને ડીજીટલ પુસ્તક બનાવ્યું છે.આ પુસ્તકમાં ઘણી બધી માહિતીનો સમાવેશ કરવામાં આવ્યો છે.આ પુસ્તકનું વિમોચન 2-10-2025 ગુરૂવાર વિજયાદશમીના પરમ પવિત્ર દિવસે જલારામ મંદિર ડીસા ખાતે વિવિધ મહાનુભાવોની સ્નેહાળ ઉપસ્થિતિમાં કરવામાં આવ્યું હતું.સંઘમાં પ્રાથમિક વર્ગ, પ્રથમ વર્ષ, દ્રિતીય વર્ષ અને તૃતીય વર્ષ એમ ચાર પ્રકારના સંઘ શિક્ષા વર્ગ હોય છે.સંઘ દ્વારા વ્યક્તિ નિર્માણથી રાષ્ટ્ર નિર્માણનું ખૂબ જ અભિનંદનીય કાર્ય થાય છે.આર.એસ.એસ.ના માધ્યમથી વિજયાદશમી,મકરસંક્રમણ, વર્ષ પ્રતિપદા, હિંદુ સામ્રાજ્ય દિનોત્સવ, ગુરૂપૂર્ણિમા, રક્ષાબંધન જેવા ઉત્સવોની ખૂબ જ ગર્વ,ગૌરવ, ગરિમા અને આદરપૂર્વક ઉજવણી કરવામાં આવે છે.આ તમામ ઉત્સવો પૈકી વિજયાદશમી ઉત્સવ ઉજવણી વખતે શસ્ત્રપૂજન કરવામાં આવે છે. હિંદુહ્દયસમ્રાટ છત્રપતિ શિવાજી મહારાજના રાજ્યાભિષેક નિમિત્તે હિંદુ સામ્રાજ્ય દિવસની ઉજવણી કરવામાં આવે છે.ગુરૂપૂર્ણિમાના ઉત્સવ નિમિત્તે તમામ સ્વયંસેવકો પોતપોતાના ક્ષેત્ર-શાખામાં પરમ વંદનીય ગુરૂ સમાન ભગવા ધ્વજનું ખૂબ જ આદરપૂર્વક પૂજન કરી ગુરૂદક્ષિણા અર્પણ કરે છે.કાળી ટોપી, સફેદ શર્ટ, બેલ્ટ,ખાખી પેન્ટ, કાળાં બૂટ, મોજાં અને દંડથી સજ્જ સ્વયંસેવકના રોમેરોમમાં રાષ્ટ્રીયતા ભરેલી હોય છે.અનેક નગરોમાં પ્રતિવર્ષ આર.એસ.એસનું ખૂબ જ શિસ્તબધ્ધ પથ સંચલન થાય છે.આ પંથ સંચલન ખૂબ જ ભવ્ય, દિવ્ય, પવિત્ર અને જોવાલાયક હોય છે. શારીરિક તેમજ માનસિક મજબૂતાઈ માટે શાખામાં અલગ અલગ પ્રકારની રમતો રમાડવામાં આવે છે.બૌધ્ધિક પ્રવચનો પણ સમયાંતરે થતાં હોય છે.
સંઘથી જોડાવું, સંઘનું કામ કરવું,સંઘના હિતેચ્છુ હોવું કે સંઘના કાર્યને પ્રોત્સાહન આપવું એ રાષ્ટ્રનિર્માણનું ખૂબ જ મહત્વપૂર્ણ કાર્ય છે. રાષ્ટ્રીય એકતા તેમજ હિંદુ જાગરણ માટે સંઘ દ્વારા સમયાંતરે વિવિધ કાર્યક્રમો થતા જ રહે છે.સંઘની પ્રેરણા અને આશીર્વાદથી જ ભારતીય કિસાન સંઘ, ભારતીય મજદૂર સંઘ,વિશ્વ હિન્દુ પરિષદ, અખિલ ભારતીય વિદ્યાર્થી પરિષદ, બજરંગ દળ,દુર્ગાવાહિની, રાષ્ટ્રીય સેવિકા સમિતિ,વિધાભારતી, સ્વદેશી જાગરણ મંચ, હિંદુ યુવા વાહિની, અખિલ ભારતીય રાષ્ટ્રીય શૈક્ષણિક સંઘ,વનવાસી કલ્યાણ પરિષદ,ભારત વિકાસ પરિષદ જેવી અનેક સંસ્થાઓ કાર્યરત છે.આદિવાસી/વનવાસી વિસ્તારમાં સંઘનું ખૂબ જ મોટું કામ ચાલે છે.સમાજના પ્રત્યેક વર્ગને જોડવાનું અને સૌને રાષ્ટ્રીય પ્રવાહ સાથે સંકળાયેલા રાખવાનું ખૂબ જ ગૌરવપૂર્ણ કામ સંઘ દ્વારા થાય છે.વર્તમાન રાજકારણમાં અને ખાસ કરીને ભારતીય જનતા પાર્ટીના તમામ નેતાઓ સંઘના પાયાના સ્વયંસેવક છે.ભારત દેશ અનેક પક્ષ,ધર્મ, પ્રાંત,ભાષા,વેષ, વિસ્તાર, વ્યવસ્થા, વ્યવહાર, રહેણીકરણીથી રંગાયેલો છે.ભારત દેશને મજબૂત રાખવા અનેક ધાર્મિક તેમજ સામાજીક સંગઠનો પોતપોતાની રીતે કાર્યરત છે જ.રાષ્ટ્રીય સ્વયંસેવક સંઘને લીધે જ આજદિન સુધી ભારત એક, અખંડિત અને સુરક્ષિત રહ્યું છે તેમ કહેવું ખોટું નથી જ. પાંચ પાયાના સમર્પિત સ્વયંસેવકોથી શરૂ થયેલ સંઘનું આ વિચારબીજ આજે નિસ્વાર્થભાવે 60 લાખ સ્વયંસેવકો સુધી પહોંચી વટવૃક્ષ બન્યું છે એ ખૂબ જ આનંદની વાત કહેવાય.સંઘના માધ્યમથી લાખો સ્વયંસેવકો સમર્પિત ભાવથી માં ભારતી માટે રાતદિવસ કામ કરે એ આપણું અને ભારત દેશનું મહાસદભાગ્ય કહેવાય.રાષ્ટ્રીય સંકટ હોય કે કુદરતી આફતો હોય સંઘની સેવા હરહંમેશ મળતી રહી છે.
આઝાદીનાં 75 વર્ષની ઉજવણી આપણે કરી ચૂક્યા છીએ.આ આઝાદીને વધારે સારી રીતે જાળવવી હોય તેમજ ભારત દેશને વધારે મજબૂત બનાવવો હોય તો આર.એસ.એસ.ના કાર્યને પ્રત્યક્ષ કે પરોક્ષ રીતે આપણે સહકાર આપવો જ રહ્યો.આ વર્ષે આપણે આર.એસ.એસ.ના 100 વર્ષનો ઈતિહાસ જાણીએ, વાંચીએ,અનુભવીએ,પ્રચાર કરીએ, સહકાર આપીએ તો પણ ભારત રાષ્ટ્રની ખૂબ જ મોટી સેવા કરી ગણાશે.ભારત દેશના પ્રત્યેક વ્યક્તિ, પરિવાર, ગામ,નગર, મહાનગર, રાજ્ય એમ સૌની રક્ષા માટે સતત ચિંતન કરી નિરંતર નિષ્ઠાપૂર્વક પ્રયત્નો કરનાર રાષ્ટ્રીય સ્વયંસેવક સંઘને શતાબ્દિ વર્ષ નિમિત્તે કોટિ કોટિ વંદન.. અભિનંદન તેમજ અઢળક શુભેચ્છાઓ.
‌‌ભગવાનભાઈ બંધુ
મોબાઈલ 9825638643