*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:પૂજ્ય સ્વામી સચ્ચિદાનંદજીની હરિદ્વાર યાત્રા વેળાએ આનંદધામની યાદગાર મુલાકાત*

જીવનદર્શન
પૂજ્ય સ્વામી સચ્ચિદાનંદજીની હરિદ્વાર યાત્રા વેળાએ આનંદધામની યાદગાર મુલાકાત
ભારતભૂમિમાં અનેક સંતો વિચરણ કરે છે.ભકિતનિકેતન આશ્રમ,દંતાલી,તાલુકો-પેટલાદ, જિલ્લો-આણંદ, ગુજરાત,ભારતના પૂજ્ય સ્વામી સચ્ચિદાનંદજી મહારાજનું જીવન, વિચાર,કર્મ,આચરણ, વ્યવહાર , પ્રવાસ,પ્રવચન,લેખન એમ બધું જ અનેકજનો માટે દીવાદાંડી સમાન છે.તારીખ 21-11-2018 ના રોજ તેમણે અંદાજે એકસો હરિભક્તો સાથે અમદાવાદથી ટ્રેન મારફત હરિદ્વાર મુસાફરી કરી આનંદધામના અધ્યક્ષ જયરામભાઈ રાજગોરના ઉત્સાહ, પ્રેમ અને આગ્રહને લીધે પાંચ દિવસ માટે ત્યાં જ મુકામ કર્યો હતો.22-11-2018 થી 27-11-2018 સુધી રોકાઈ સૌ 27-11-2018 ના રોજ હરિદ્વારથી પરત અમદાવાદ આવવા રવાના થયા હતા. દેશ-વિદેશમાં અનેક સ્થળોએ સ્વામીજી ફર્યા છે.અનેક સ્થળો જોયાં છે અને તેનો ઝીણવટપૂર્વક અભ્યાસ કર્યો છે.એમના અનુભવો પુસ્તકોમાં પ્રગટ થયા છે.સ્પષ્ટ અને સાચાબોલા સ્વામીજી તરીકે તેમની આગવી નામના છે.આનંદધામના અધ્યક્ષ જયરામભાઈનો આગ્રહ ખરા દિલથી હતો એટલે સારી કીમતી હોટલોમાં પણ જે ભાવ કે ઉમળકો ના હોય તે આનંદધામમાં જોવા મળ્યો હતો.
હરિદ્વાર તીર્થધામ કરતાંય જયરામભાઈનો ભાવ સ્વામીજી ઉપર વધારે અસર કરી ગયો.ચાર-પાંચ દિવસ બધાયે ખૂબ જ આનંદ કર્યો.હરિદ્રારમાં પૂજ્ય સ્વામીજી સાથે લોકો રહ્યા,રમ્યા, જમ્યા, ફર્યા, આનંદ કર્યો.ફરી પાછી એજ ટ્રેનમાં અમદાવાદ પરત આવ્યા.યાત્રા નિર્વિઘ્ને સારી રીતે પૂર્ણ થઈ તેનો સૌને સવિશેષ આનંદ હતો.મોટાભાગે બહારગામનો પ્રવાસ કે યાત્રામાં યાત્રિકોને સાચવવાનું અને તેમના મનને રાજી રાખવાનું ખૂબ જ અઘરૂં હોય છે.જોકે સારૂં કામ હોય એટલે ઈશ્વરકૃપાથી બધું જ હેમખેમ પાર પડે છે.શિસ્તબધ્ધ,સહનશીલ, જતું કરવાની ભાવનાવાળા, ભાવુક, પરોપકારી અને ઉદાર યાત્રિકો હોય તો દરેક યાત્રા અનેક મુશ્કેલીઓ વચ્ચે પણ આનંદથી પાર પડે છે.આ યાત્રા વિષે કંઈ લખવાની ઈચ્છા સ્વામીજીની નહોતી જ.તોપણ થોડાં સંસ્મરણો “હરિદ્વારની યાત્રા” એ નિમિત્તે 62 પેજમાં નાનકડી પ્રેરણાદાયી પુસ્તિકા લખી છે.પુસ્તિકા માહિતી બુક નથી પણ તેમાં પૂરેપૂરો ભાવ ભરેલો છે.આ સંસ્મરણ બુક કે અનુભવ બુકથી કોઈકને પ્રેરણા મળે એ દષ્ટિએ જ આ નાનકડી બુક સ્વામીજીએ લખી છે.બુકમાં અનેક વખત તેમણે આનંદધામના અધ્યક્ષ જયરામભાઈનો ઉલ્લેખ કરીને તેમનો સ્વભાવ, ઉત્સાહ,ભાવ, કાર્યપધ્ધતિ,લાગણીની સરાહના કરી છે.ઉતરાખંડ લીલોછમ અને હરિયાળો પ્રદેશ છે.છસ્સો વર્ષ સુધી બાદશાહોના શાસનને લીધે ટ્રેનમાં મુસાફરી કરતાં મસ્જિદોના ઊંચા ઊંચા મિનારાઓ ઉતરપ્રદેશ, ઉત્તરાખંડ અને હરિયાણામાં વારંવાર નજરે પડે છે તેના તરફ સ્વામીજીની દષ્ટિ ગઈ છે.
મુસાફરી દરમિયાન હરિદ્વાર ટ્રેન ચાર કલાક મોડી હતી,તોપણ બધામાં ઉત્સાહ જબરજસ્ત હતો.હરિદ્રાર રેલ્વે સ્ટેશન ઉપર જયરામભાઈ સૌને આવકારવા હારમાળાઓ લઈને પહોંચી ગયા હતા.જયરામભાઈ બનાસકાંઠા જિલ્લામાં આવેલ કાંકરેજ તાલુકાના મુખ્ય મથક શિહોરી ગામના ઔદિચ્ય બ્રાહ્મણ છે.ઔદિચ્ય-ઉધ્ધારક પૂજનીય, વંદનીય સંતશ્રી આનંદપ્રકાશ બ્રહ્મચારીજી બાપુના તેઓ સમર્પિત શિષ્ય અને અનન્ય ભક્ત છે.નાની ઉંમરથી જ ધાર્મિક વૃત્તિના હોવાથી જન્મજાત પ્રકૃતિ મુજબ અનેક સાધુસંતોના સંપર્કમાં તેઓ આવ્યા છે.
જયરામભાઈ પૂજ્ય સ્વામી સચ્ચિદાનંદજીના સંપર્કમાં પણ આવ્યા અને સ્વભાવથી તેમનો મેળ થઈ ગયો.જયરામભાઈની ઈચ્છા પોતાના ગુરૂજી પૂજ્ય આનંદપ્રકાશ બ્રહ્મચારીજી બાપુની દિવ્ય સ્મૃતિમાં બદ્રીનાથ ખાતે આશ્રમ બનાવવાની હતી.પરંતુ પૂજ્ય સ્વામી સચ્ચિદાનંદજીની સલાહ ,સમજ, માર્ગદર્શન અને વૈચારિક અસરથી તેમણે વિચાર બદલ્યો અને હરિદ્વારમાં જમીન લઈને આશ્રમ બનાવ્યો.22 રૂમો,હોલ, રસોડું,લીફટ એમ બધી જ સગવડો ઊભી કરવામાં આવી છે. ‌આશ્રમ નિર્માણમાં જસવંતભાઈ કોટક સહિત સૌ ટ્રસ્ટીઓ, દાતાઓ,સહયોગીઓનો સહકાર અને માર્ગદર્શન મળતું જ રહ્યું છે.યાત્રિક પાસેથી ચાર્જ લેવો કે કેમ અને લેવો તો કેટલો લેવો? એ પ્રશ્ર્ન હતો.આપણા દેશમાં મોટાભાગનાં ધર્મસ્થાનો -મંદિરો કોમર્શિયલ થઈ ગયાં છે.જલારામબાપાના વીરપુર જેવું એકાદ સ્થળ આજે પણ છે કે જ્યાં એકપણ પૈસો દાન લેવાતું નથી.લગભગ માણસ માત્રમાં કોમર્શિયલ વૃત્તિ સહજ બની ગઈ છે, તેમાંથી કોઈક વિરલો જ બચી શકે. પૂજ્ય સ્વામીજીની દષ્ટિએ આવા વિરલા એટલે શ્રી જયરામભાઈ રાજગોર.તેમણે નક્કી કર્યું કે કશો જ ચાર્જ ના લેવો.આવો નિર્ણય કોઈ ધનાઢ્ય શેઠે પણ કર્યો હોય તેવું જાણ્યું નથી.આવો નિર્ણય તો જયરામભાઈ જેવો કોઈ બ્રાહ્મણ જ કરી શકે.ધીરે ધીરે લોકોના આગ્રહથી વ્યવસ્થાના ભાગરૂપે 100 રૂપિયા ચાર્જ કર્યો.100 રૂપિયામાં ગરમ પાણી, રહેવું, જમવું,ચા-નાસ્તો વગેરે બધું જ આવી જાય.મધ્યમ વર્ગ અને ગરીબો માટે આનંદધામ અતિ આશીર્વાદરૂપ બની ગયું છે.વ્યવસ્થાના ભાગરૂપે વર્તમાનમાં થોડોક ચાર્જ વધાર્યો છે.હરિદ્રારમાં દોઢસો રૂપિયા તો ચા-નાસ્તાના જ થઈ જાય.બધા માટે એકસરખું રહેવાનું, જમવાનું,ચા-નાસ્તો,કશો જ ભેદભાવ નહીં. આવું તો ભાગ્યે જ જોવા મળે.જયરામભાઈ સાદાં વસ્ત્રોમાં સંતરૂપ, તીર્થરૂપ જેવા લાગે છે.
આનંદધામ પહોંચતાં જ પૂજ્ય સ્વામી સચ્ચિદાનંદજી સહિત તમામ યાત્રિકોને સારી રીતે પૂરતા સ્નેહથી વધાવી આવકારવામાં આવ્યા હતા.પૂજય સ્વામીજીને નીચે સંતનિવાસમાં જ ઉતારો અપાતાં વધારે અનુકૂળતા રહી હતી.હરિદ્રારને પંચપુરી કહેવાય છે.તે આ પ્રમાણે છે.હરિદ્રાર,કનખલ,ભીમગૌડા,ભુપતવાલા અને સપ્ત સરોવર.ઉનાળાની સીઝનમાં હરિદ્વારમાં પગ મૂકવાની જગ્યા નથી મળતી.જોકે આ આયોજન વિનાનો વિકાસ કહેવાય.હરિદ્રાર જવા માટે અમદાવાદ અને સુરતથી દહેરાદૂન વિમાનો આવે-જાય છે.હરની પૈડી ઉપર રોજ સાંજે ગંગાઆરતી થાય છે.આ ભવ્ય આરતી જોવા અને લેવા ભારે ભીડ થાય છે.બધા આરતી જોઈ-કરી ધન્યતા અનુભવે છે.ગંગામૈયાનું જળ એકદમ પવિત્ર, નિર્મળ અને ચોખ્ખું છે.પણ ભાવિકો સતત ગંદકી કરતા જ રહે છે.
પૂજ્ય સ્વામી સચ્ચિદાનંદજીની હરિદ્વાર યાત્રા અને તેમાંયે આનંદધામમાં ઉતારો એક યાદગાર યાત્રા બની ગઈ.જયરામભાઈ જેવા ઉત્સાહી, ધર્મપ્રેમી,સંતપ્રેમી, નખશીખ સજ્જન મળ્યા તેનો સ્વામીજીને આનંદ હતો.પૂજ્ય સ્વામી સચ્ચિદાનંદજી મહારાજનું સાહિત્ય ક્ષેત્રે આગવું પ્રદાન છે.આ માટે ભારત સરકાર દ્રારા મહામહિમ રાષ્ટ્રપતિજીના વરદહસ્તે તેમનું પદ્મભૂષણ એવોર્ડથી શાનદાર સન્માન થયેલ છે.સ્વામી સચ્ચિદાનંદજી એક સારા વિચારક, વાંચક, લેખક,વકતા, સાહિત્યકાર, માર્ગદર્શક અને લોકઉધ્ધારક છે.અત્યારે સૌથી વધુ સડો ધર્મક્ષેત્રમાં વ્યાપ્ત છે ત્યારે સ્વામી સચ્ચિદાનંદજી જેવા સાચાબોલા સંતો ખૂબ જ ઓછા છે.સ્વામી સચ્ચિદાનંદજીના વિચાર,આચાર અને વ્યવહારમાં સંપૂર્ણ એકરૂપતા તેમજ શુધ્ધિ છે.સંન્યાસ,સંસાર અને સમાજમાં વ્યાપેલી બદીઓ વિષે તેમની એકદમ સ્પષ્ટ વાણી તેમજ વિચારસરણી છે.શ્રી જયરામભાઈ રાજગોર ખૂબ જ ભાવુક અને ધાર્મિક વ્યકિત છે.તેમને અભિનંદન આપવા તેમનો મોબાઈલ નંબર 9426304047 છે.પૂજ્ય સ્વામી સચ્ચિદાનંદજી મહારાજ એમના આનંદધામ આશ્રમમાં પાંચ દિવસ રોકાયા તેનો તેઓ અનહદ આનંદ વ્યક્ત કરતા રહે છે.આનંદધામ આશ્રમના મેનેજર ઉમેશભાઈનો સ્વભાવ અને આવકાર પ્રશંસનીય છે.પૂજ્ય સ્વામી સચ્ચિદાનંદજી મહારાજની હરિદ્વાર યાત્રા, આનંદધામ આશ્રમમાં રોકાવાની યોગ્ય વ્યવસ્થા અને જયરામભાઈની મહેમાનગતિ એ બધાનું સંકલન કરીને મને પણ થોડુંક લખવાની તક મળી એ બદલ મારી જાતને ભાગ્યશાળી સમજું છું.
પૂજ્ય સ્વામી સચ્ચિદાનંદજી મહારાજને ખૂબ જ આદરપૂર્વક કોટિ કોટિ વંદન.આદરણીય જયરામભાઈ રાજગોરની દરિયાદિલીને સ્નેહપૂર્વક અભિનંદન….
ભગવાનભાઈ બંધુ
બી.એ,બી.એસ.સી,એલ.એલ.બી
ડીસા – બનાસકાંઠા
મોબાઈલ..7984481168