*𝐇𝐄𝐋𝐋𝐎 𝐌𝐎𝐑𝐁𝐈 𝐍𝐄𝐖𝐒:વઢિયાર રત્ન ગૌરવ એવોર્ડથી સન્માનિત રાધનપુરના નટુભાઈ ઠક્કર એક પ્રેરણાદાયી વ્યક્તિત્વ*

વઢિયાર રત્ન ગૌરવ એવોર્ડથી સન્માનિત રાધનપુરના નટુભાઈ ઠક્કર એક પ્રેરણાદાયી વ્યક્તિત્વ
વઢિયાર રત્ન ગૌરવ એવોર્ડથી જેમનું તાજેતરમાં જ સમી ખાતે શાનદાર સન્માન થયું એવા માનનીય મુરબ્બી નટુભાઇ દયારામભાઈ ઠક્કરનું મૂળ વતન સાંથલી છે. 60 -70 વર્ષ પહેલાં ગામડાઓમાં ધોરણ એકથી ચારની શાળાઓ જ હતી. ધોરણ ચાર સુધીનો અભ્યાસ તેમણે સાંથલી મુકામે કર્યો. ધોરણ પાંચનો અભ્યાસ વારાહી ખાતે તેમના પિતરાઈને ત્યાં રહીને કર્યો હતો. આ અરસામાં રાધનપુર ખાતે લોહાણા બોર્ડિંગની શરૂઆત થઈ. તેથી પછીનો અભ્યાસ રાધનપુર લોહાણા બોર્ડિંગમાં રહીને કર્યો. લોહાણા બોર્ડિંગમાં તે વખતે જ્ઞાતિના 100 જેટલા વિદ્યાર્થીઓ અભ્યાસ કરતા હતા. તેમણે એસ.એસ.સી. સુધીનો અભ્યાસ શેઠ કે. બી. વકીલ હાઈસ્કૂલમાં રહીને કર્યો હતો. તે વખતે પરમ આદરણીય,વંદનીય શંભુભાઈ ઠક્કર સાહેબ શેઠ કે. બી. વકીલ હાઈસ્કૂલના આચાર્ય હતા. તેઓ વિદ્યાર્થીઓ પ્રત્યે ખૂબ જ લાગણીશીલ હતા. શેઠ કે. બી .વકીલ હાઈસ્કૂલના ઘણા શિક્ષકો પાછળથી ભાભર, દિયોદર ,થરા વગેરે હાઇસ્કૂલોમાં આચાર્ય તરીકે જોડાયા હતા. નટુભાઈ ઠક્કરના જીવન ઉપર આચાર્ય શંભુભાઈ ઠક્કર સાહેબનો ખૂબ જ મોટો પ્રભાવ પડ્યો.
શેઠ કે .બી. વકીલ હાઈસ્કૂલ સામે બિસ્મિલ્લાખાનજી લાઇબ્રેરી છે. તેમાં તેઓ અવારનવાર જતા. તેમાં આવતાં બાલ સામયિકોના વાંચનથી શિક્ષણ પરત્વે તેમનું આકર્ષણ વધ્યું અને શિક્ષણક્ષેત્રે તેમનું વિશેષ ઘડતર થયું.એસ.એસ.સી નો અભ્યાસ પૂર્ણ કર્યા બાદ તેમણે સાંથલીમાં દુકાન સંભાળી.તે વખતે ચાર ગામ વચ્ચે અનાજ દળવાની એક જ ઘંટી હતી તે તેમણે સંભાળી. 1966માં તેમને શિક્ષક તરીકે નોકરી મળી. તેમના વતન નજીકના ગામ લીંબડકા ખાતે શિક્ષક તરીકેની નોકરીની શરૂઆત થઈ.એ પછી જુદા જુદા ગામોમાં તેમની બદલી થતી રહી. 1977 માં તેમના વતન સાંથલીમાં જ શિક્ષક તરીકે તેમની બદલી થઈ. તેમને નોકરી દરમિયાન ગિજુભાઈ બધેકા “મુછાળીમા”ના બાલ સાહિત્યનો પરિચય થયો. તેઓ પ્રાર્થના સમયે બાળકોને ગિજુભાઈની બાળવાર્તાઓનું પઠન કરાવતા. પછી તો રમણલાલ સોની, જીવરામ જોશી, પનાલાલ પટેલ, યશવંત મહેતા જેવા સાહિત્યકારોની વાર્તાઓનું પઠન પણ થતું રહ્યું. બાળકોમાં સાહિત્યનો રસ વધતો રહ્યો. તેમનો કંઠ પણ ખૂબ જ સરસ એટલે તેઓ જોડકણા, બાલગીતો રજૂ કરતા. બાળકોને તેમાં ખૂબ જ આનંદ આવતો. આ રીતે બાળકોમાં વાર્તા કથન, બાલગીતો દ્વારા સાહિત્ય સંસ્કારનું સિંચન તેઓ નિરંતર કરતા રહ્યા. તેમણે સ્વૈચ્છિક નિવૃત્તિ બાદ બાળકોને ઓછી કિંમતે સારા પુસ્તકો મળે તે માટે ગિજુભાઈ સાહિત્ય ફૂલવાડીની શરૂઆત કરી. રાધનપુરમાં અમર જ્યોત એજ્યુકેશન ટ્રસ્ટ દ્વારા ગુજરાતી સાહિત્ય પરિષદનું જ્ઞાનસત્ર યોજાયું હતું તેમાં ચીમનભાઈ ત્રિવેદી, નરોતમ પલાણ, કનુભાઈ આચાર્ય, ભગવાનદાસ બંધુની હાજરીમાં દીપ પ્રાગટ્ય કરી ગિજુભાઈ સાહિત્ય ફૂલવાડી ની શરૂઆત કરી. ગિજુભાઈ સાહિત્ય ફૂલવાડી દ્વારા લોક મિલાપ ટ્રસ્ટ, સહજાનંદ રૂરલ ટ્રસ્ટ તેમજ સચ્ચિદાનંદજીના પુસ્તકોના પ્રચાર પ્રસાર માટે સો કરતાં વધારે પુસ્તક મેળાનું આયોજન તેમણે કરેલ છે. જુદી જુદી શાળાઓમાં જઈ વાર્તા કથન, બાળગીતોના 100 કરતાં વધારે કાર્યક્રમો રજૂ કર્યા છે. તેઓ સ્વામી સચ્ચિદાનંદજીના સાહિત્યના પ્રખર ચાહક હોવાથી દર વર્ષે રામનવમીના અવસરે નડાબેટ ખાતે સ્વામી સચ્ચિદાનંદજીને મળવા અચૂક પહોંચી જાય છે. સ્વામી સચ્ચિદાનંદજીના પ્રવચનના આધારે મુક્તિલાલ વિરવાડિયા તેમજ આચાર્ય શંભુભાઈ ઠક્કરના નામ પર રાધનપુરમાં બાલ પુસ્તકાલયની સ્થાપના થાય તેમજ તેમના સ્ટેચ્યુ પણ ગામમાં મૂકવામાં આવે તેવી રજૂઆત તેઓ ઘણા સમયથી કરતા રહયા છે. બાલ પુસ્તકાલયમાં બાળકો માટે તેમજ વડીલો માટે નિયમિત પ્રવૃત્તિઓ થાય અને આનંદ પ્રમોદથી તેમનો સમય પસાર થાય તેવી વિચારધારા સાથે અવારનવાર રાજકીય નેતાઓને રજૂઆત કરે છે. વર્તમાનપત્રોમાં ચોપાનિયા મૂકી લોકજાગૃતિનું અદભુત કાર્ય કરી રહ્યા છે એવા નટુભાઈ ઠક્કરને ખૂબ જ આદરપૂર્વક વંદન, અભિનંદન તેમજ ભવિષ્યની તેમની સાહિત્ય જગતની પ્રવૃત્તિઓ માટે અઢળક શુભેચ્છાઓ.
નટુભાઈ વિષેની આ માહિતી પ્રાપ્ત કરવામાં સહાયક બનનાર ખૂબ જ ઉત્સાહી શિક્ષક રાધનપુરના કલ્પેશભાઈ ઠક્કરનો પણ ખૂબ ખૂબ આભાર.
નટુભાઈ ઠક્કર જેવા ઓલિયા માણસોને લીધે જ અનેક જરૂરિયાતમંદ બાળકો સુધી જીવનલક્ષી સાહિત્ય પહોંચતું હોય છે એ પણ ગૌરવ લેવા જેવી બાબત છે.નટુભાઈ ઠક્કરને અભિનંદન આપવા તેમનો મોબાઈલ નંબર 8849464707 છે
વઢિયાર રત્ન ગૌરવ પુરસ્કારની શરૂઆત 2024 થી કરવામાં આવી છે.વઢિયાર સેવા સમિતિ દ્વારા સેવા, સાહિત્ય, શિક્ષણ,કલા જેવા ક્ષેત્રોમાં વઢિયાર પંથકમાં જેમણે આગવું ઉમદા કાર્ય કર્યું હોય તેમને વઢિયાર રત્ન ગૌરવ એવોર્ડથી સન્માનિત કરવામાં આવે છે.પ્રથમ કાર્યક્રમ સમશેરપુરામાં પૂજ્ય નિજાનંદ સ્વામીજી તેમજ ધારાસભ્ય શ્રી લવિંગજી સોલંકીની હાજરીમાં થયો હતો.બીજો કાર્યક્રમ સમી મુકામે 2025 માં થયો હતો.ત્રીજો કાર્યક્રમ તાજેતરમાં જ 30 જાન્યુઆરી 2026 શુક્રવારે સમી મુકામે થયો હતો.આ કાર્યક્રમમાં નટુભાઇ ઠક્કરનું ગૌરવભેર શાનદાર સન્માન થયું એનો અત્યંત રાજીપો થયો છે…
શ્રી નટુભાઇ ઠક્કરના શેષ જીવનની સક્રિયતા તેમજ સારી તંદુરસ્તી માટે વિશેષ પ્રાર્થના સહ શુભકામનાઓ…
ભગવાનભાઈ બંધુ
ડીસા -ગુજરાત
મોબાઈલ:9825638643